- UBAYA wa neno moja, kweli hatari jamani,
Hata ukija na hoja, vigumu kukuamini,
Wachafua kama haja, ya kuitupa shimoni,
Ubaya wa neno moja, unaleta mpasuko. - Laweza kuwa ni Bebi, kutoka kwake mtani,
Hata kama wewe rabi, utasemwa kama nini,
Utaambiwa ni bibi, mwafanya ya kishetani,
Ubaya wa neno moja, unaleta mpasuko. - Pengine neno mpenzi, toka mwenzako kazini,
Huyo wala sio mwenzi, kaandika kiutani,
Utayapata makonzi, ya laana mdomoni,
Ubaya wa neno moja, unaleta mpasuko. - Anasema amepatwa, alipofika nyumbani,
Kajikuta anasutwa, kwa neno moja simuni,
Ni kwa vile ameitwa, switihati na jirani,
Ubaya wa neno moja, unaleta mpasuko. - Hakuliki ni balaa, kama mawe kwa sahani,
Hasira zimemjaa, anakuita muhuni,
Neno moja la unaa, linaondoa amani,
Ubaya wa neno moja, unaleta mpasuko. - Utajieleza vipi, mke kashika mpini,
Uso utaficha wapi, waonekana mgoni,
Jitetee mara ngapi, unatokoswa mekoni,
Ubaya wa neno moja, unaleta mpasuko. - Familia huvunjika, neno likiwa kitini,
Watoto wanasumbuka, na kubaki mashakani,
Kwa sababu limetoka, neno moja mdomoni,
Ubaya wa neno moja, unaleta mpasuko. - Muda mwingine vigumu, neno hilo libaini,
Kwamba litakuwa sumu, kwa huyo wako mwandani,
Ungejua ungedumu, kutoliweka hewani,
Ubaya wa neno moja, unaleta mpasuko. - Ubaya wa neno moja, nani aweza baini?
Iwe wewe ni wa kuja, au mwenyeji mjini,
Lazuka kama kioja, sawa na mwiba mwilini,
Ubaya wa neno moja, unaleta mpasuko. - Kuepuka maumivu, ni bora kutosaini,
Kwamba neno ni uovu, unaotendwa gizani,
Usisababishe povu, na kujitesa moyoni,
Ubaya wa neno moja, unaleta mpasuko. - Kama zuia twaweza, neno lisije sokoni,
Hapo tutazipunguza, kelele nyingi nyumbani,
Upendo tutakoleza, usotutia vitani,
Ubaya wa neno moja, unaleta mpasuko. - Ila kuaminiana, ni kuzuri kama nini,
Kwapunguza kusigana, na kukoleza amani,
Kila mtu anaona, bora heshima ya ndani,
Ubaya wa neno moja, unaleta mpasuko.
Na Lwaga Mwambande (KiMPAB) lwagha@gmail.com