NATAFUTA MARAFIKI

NATAFUTA marafiki, miongoni mwa wanangu,
Kwa mama hawabanduki, hata nikiwapa fungu,
Wanataka ipi kiki, ya kuwasogeza kwangu?
Jamani nishaurini, nisibakie mpweke.
Ada ninalipa mimi, kupitia kwa mwenzangu,
Na kitengo cha uchumi, hicho ni himaya yangu,
Iweje hawa wasomi, kwao niwe nyanya chungu?
Jamani nishaurini, nisibakie mpweke
Tulipoenda likizo, mzigo likuwa kwangu,
Japo kulipia tozo, aliyefanya mwenzangu,
Na gharama zinginezo, bili yote juu yangu,
Jamani nishaurini, nisibakie mpweke.
Wekundu wa Msimbazi, wengi wamejaa kwangu,
Japo mwenzangu mzazi, pia anayo mafungu,
Ila mengi matumizi, yako mabegani mwangu,
Jamani nishaurini, nisibakie mpweke.
Simu zile za kisasa, kwa ajili ya wanangu,
Nilizinunua kosa, aliyewapa mwenzangu,
Mbona sasa wanitosa, na kunipiga majungu?
Jamani nishaurini, nisibakie mpweke.
Kuna wakati mwingine, wataka kampani yangu,
Nami kwa kazi zingine, ninamtuma mwenzangu,
Sasa ndio wanione, kama upepo kwa wingu?
Jamani nishaurini, nisibakie mpweke.
Niliagiza samaki, niitibu hamu yangu,
Nitafune na matoki, au chele la Usangu,
Na nyumbani sibanduki, nikisubiria changu,
Jamani nishaurini, nisibakie mpweke.
Samaki hawakuleta, hata wale wa mafungu,
Sebuleni wakapita, pasipo heshima yangu,
Hivi miye kwao Tata, au wa unga mzungu?
Jamani nishaurini, nisibakie mpweke.
Kuna siku nimepanga, tumtembelee Sangu,
Watoto wakaniunga, ikawa furaha yangu,
Mama yao akapinga, tutamaliza mafungu,
Jamani nishaurini, nisibakie mpweke.
Watoto wakageuka, safari kapigwa pingu
Ya mama yakayashika, wakayatosa ya kwangu,
Pamoja na kuumbuka, nilibaki na uchungu,
Jamani nishaurini, nisibakie mpweke.
Tena akafika ndugu, wa nyumbani kwa babangu,
Mke kamuona gugu, kamuwekea kiwingu,
Watoto zao vurugu, akalala kwa uvungu,
Jamani nishaurini, nisibakie mpweke.
Kesho yake aliaga, akiwa nje ya kwangu,
Ile simu alipiga, alisema kwa uchungu,
Na kwa kinagaubaga, kamwe hatakuja kwangu,
Jamani nishaurini, nisibakie mpweke.
Watoto hawanitaki, wamuandama mwenzangu,
Ndugu zangu nao nduki, hawaji nyumbani kwangu,
Mbona mambo haya dhiki, kuzidi umri wangu?
Jamani nishaurini, nisibakie mpweke.
Kuwaonya nawaonya, kwani ni watoto wangu,
Mama yao kiwasonya, ndipo wanakuja kwangu,
Nikiwapa la kufanya, wadharau neno langu,
Jamani nishaurini, nisibakie mpweke.
Hivi niwafanye nini, wawe marafiki zangu,
Hebu nipeni maoni, mniondoe uchungu,
Hata lini hii soni, wakati nina wanangu?
Jamani nishaurini, nisibakie mpweke.
Natamani acha kazi, nikae nao wanangu,
Ndururu za matumizi, ndizo zanitia pingu,
Sipati usaidizi, kwake mzazi mwenzangu,
Jamani nishaurini, nisibakie mpweke.
Kwenda kwa viti virefu, hiyo si tabia yangu,
Takaa muda mrefu, kuyapoteza mafungu,
Nilale kwenye sakafu, niugulie kivyangu,
Jamani nishaurini, nisibakie mpweke.
Ni hekima toka zama, zile za wazee wangu,
Nafasi ya huyo mama, ni bora kuliko yangu,
Nabaki kushika tama, kama zee la kizungu,
Jamani nishaurini, nisibakie mpweke.
Watoto ona huruma, kwani nyie ni wanangu,
Pale ninapowatuma, sikiza sauti yangu,
Kama nyie mkigoma, tafupisha siku zangu,
Jamani nishaurini, nisibakie mpweke.
Hata wewe mke wangu, nomba sinipe uchungu,
Kwa kuwateka wanangu, wasisikie ya kwangu,
Hebu umwogope Mungu, unanitia uchungu,
Jamani nishaurini, nisibakie mpweke.
Hii dunia ya leo, baba ninao uchungu,
Jinsi ninakosa cheo, kwa mke nao wanangu,
Nabaki kama pozeo, wakikula pesa zangu,
Jamani nishaurini, nisibakie mpweke.
Mkituheshimu sote, mi na mzazi mwenzangu,
Mnazo baraka zote, pamoja na mali zangu,
Mtakuwa kwangu pete, kama ya huyu mwenzangu,
Jamani nishaurini, nisibakie mpweke.
Lakini na wewe baba, yasikupate ya kwangu,
Pamoja na kunikaba, pengine sababu yangu,
Nilitenga muda haba, kuwa na watoto wangu,
Jamani nishaurini, nisibakie mpweke.