NA FLORAH AMON, DAR ES SALAAM
MADEREVA wa mabasi ya mwendokasi pamoja na mabasi ya kawaida ya abiria wametakiwa kutumia lugha nzuri wanapotoa huduma ili kupunguza migogoro isiyo ya lazima barabarani na kuepusha ajali.
Wito huo umetolewa leo jijini Dar es Salaam na Waziri wa TAMISEMI, Prof. Riziki Shemdoe, wakati wa kuwatunuku vyeti madereva 35 waliohitimu mafunzo ya uendeshaji wa mabasi ya mwendokasi (BRT). Mafunzo hayo yameendeshwa na Chuo cha Usafirishaji cha Taifa (NIT) kwa kushirikiana na UDART.
.
Prof. Shemdoe amesema kuwa mara nyingi migogoro hutokea kutokana na kutokuelewana kati ya madereva na abiria, jambo linaloweza kuepukwa kwa kutumia lugha yenye staha na mabishano yasiyo na tija.
“Madereva hawa wanapaswa kuwa mfano wa kuigwa laughs nzuri na ustaarabu kwa abiria si tu huongeza heshima bali pia ni sehemu ya usalama na ufanisi wa huduma, iwe ni kwenye mabasi ya mwendokasi au mabasi ya kawaida ya abiria,” amesema Prof. Shemdoe.
Aidha, ameagiza UDART kutomuajiri dereva yeyote ambaye hajapitia mafunzo rasmi ya chuo cha usafirishaji, akibainisha kuwa mafunzo hayo huwajengea uwezo wa kutumia miundombinu ya BRT kwa usahihi na usalama.
Kwa upande wake, Mkuu wa Chuo cha Taifa cha Usafirishaji (NIT), Dk. Prosper Mgaya, amesema mafunzo hayo si ya kwanza kutolewa, kwani zaidi ya madereva 250 tayari wamenufaika na programu hiyo na wameenda kufanya kazi katika kampuni ya Mofat.
“Madereva hawa wana uzoefu wa kuendesha mabasi ya abiria, lakini mabasi ya mwendokasi yana mifumo na njia tofauti. Ndiyo maana tunawajengea uwezo ili kuyamudu kwa ufanisi,” amesema Dk. Mgaya.
Awali, Mkuu wa Mkoa wa Dar es Salaam, Albert Chalamila, aliyemkaribisha mgeni rasmi, amesema mafunzo hayo yamefanyika wakati muafaka kwani mabasi mapya yanatarajiwa kuwasili hivi Karibu na madereva wanaingia kazini hivyo amewataka kuyaendesha kwa uangalifu ili yaweze kutumika kwa muda mrefu.
