NA FLORAH AMON,DAR ES SALAAM
SERIKALI imekabidhi hati isiyo asili (derivative title) kwa Kampuni ya Pan Tanzania Agriculture Developments Ltd, hatua inayolenga kuimarisha usalama wa uwekezaji na kuongeza tija katika matumizi ya ardhi kwa ajili ya shughuli za kilimo.
Makabidhiano hayo yaliyofanywa na Mamlaka ya Uwekezaji na Maeneo Maalum ya Kiuchumi Tanzania (TISEZA) jijini Dar es yametajwa kuwa sehemu ya juhudi za Serikali za kuendeleza Maeneo Maalum ya Kiuchumi (SEZ) na kuweka mazingira rafiki kwa uwekezaji wa kisasa unaotegemea kilimo, viwanda na teknolojia.
Akizungumza katika hafla hiyo, Waziri wa Nchi, Ofisi ya Rais Mipango na Uwekezaji, Profesa Kitila Mkumbo, amesema utoaji wa hati isiyo asili unampa mwekezaji uhakika wa kisheria kuendeleza mradi mkubwa wa kilimo bila kuathiri umiliki mkuu wa ardhi, sambamba na kurahisisha upatikanaji wa mikopo, bima na miundombinu ya uwekezaji.
Kwa upande wake, Mkurugenzi Mkuu wa TISEZA, Gilead Teri amesema kuwa ikiwa mwekezaji atashindwa kutekeleza mradi kwa mujibu wa sheria za ardhi, ardhi hiyo itarejeshwa kwa Serikali ili kutafutiwe mwekezaji mwingine ambapo ametoa wito kwa wadau kuendelea kushirikiana na kampuni hiyo ili mradi utekelezwe kwa manufaa mapana ya Taifa.
Mwekezaji kutoka Pan Tanzania Agriculture Developments Ltd, Dior Feng, ameishukuru Serikali kwa kuimarisha mazingira ya uwekezaji na kusema kuwa hati hiyo itawawezesha kuongeza uzalishaji, kupanua masoko na kuchangia pato la Taifa kupitia ajira na uwekezaji endelevu.
Amesema kampuni hiyo kwa kushirikiana na EPZA inaanzisha mradi wa kilimo biashara wenye thamani ya dola milioni 640, mradi ambao ni miongoni mwa mikubwa zaidi kuwahi kutekelezwa nchini.
Mradi huo unatarajiwa kufanyika katika ekari 62,000 wilayani Kilwa, hatua itakayoifanya Kilwa kuwa mojawapo ya kitovu cha kilimo cha kisasa barani Afrika.
Lengo kuu la mradi ni kuongeza uzalishaji, kuongeza thamani ya mazao na kuinua uchumi wa wananchi wa Kilwa, ambapo zaidi ya ajira 200,000 za moja kwa moja na zisizo za moja kwa moja zinatarajiwa kuzalishwa katika kipindi chote cha utekelezaji.
Wakazi wa vijiji vya Mavuji, Nainokwe, Migeregere na Liwiti watapewa kipaumbele cha ajira ili kuhakikisha kuwa manufaa ya mradi yanawafikia moja kwa moja.
Feng amesema ekari 2,000 za mradi zitatumika kujenga Kanda Maalum ya Usindikaji kwa Mauzo Nje (Agri-EPZ) itakayokuwa na viwanda vya kusindika mazao mbalimbali ikiwemo mihogo, korosho, ufuta, maharagwe, soya, matunda, chakula cha mifugo, vifungashio na bidhaa za nishati mbadala. Ekari nyingine 60,000 zitakuwa mashamba ya kisasa yatakayotumia teknolojia za droni, GPS na sensa za IoT katika upandaji, umwagiliaji na usimamizi wa mashamba.
Kwa upande wa miundombinu, mradi utawezesha ujenzi wa barabara mpya, mtandao wa maji, mfumo imara wa mawasiliano na umeme wa gesi utakaotengenezwa ndani ya eneo la mradi.
Aidha, makazi mapya, vituo vya afya, shule, maeneo ya michezo, vituo vya mafunzo na maeneo ya biashara vitajengwa ili kuboresha maisha ya wananchi wa Kilwa.
Ameongeza kuwa zaidi ya wakulima wadogo 10,000 watanufaika na mikataba ya kilimo, mafunzo na masoko ya uhakika kupitia mradi huo, hatua inayotarajiwa kuongeza kipato na kuimarisha uchumi wa jamii za vijijini.
