NI LAZIMA KUPAMBANA

1. HII ni elimu nzuri, tusije kuipuuza,
   Raha za muda ni nzuri, japo mbele zaunguza,
   Hivi nakupa habari, usije ukapuuza,
   Ni lazima kupambana, kupata vyenye thamani.
2. Vijaavyo kirahisi, bila jasho kuchomoza,
   Vikufanyavyo uhisi, starehe waongeza,
   Unategwa na kirusi, kujitoa hutaweza,
   Ni lazima kupambana, kupata vyenye thamani.
3. Mungu kakupa ujuzi, uweze kujiongeza,
   Wewe hufanyii kazi, wakaa wajilegeza,
   Kwako huo ni ulozi, mwenyewe wajichuuza,
   Ni lazima kupambana, kupata vyenye thamani.
4. Ukidharau talanta, ulopewa na Muweza,
   Na hata ile talanta, ulivyojiendeleza,
   Utapoteza talanta, nafasi ya kujieneza,
   Ni lazima kupambana, kupata vyenye thamani.
5. Ujuzi wako uhuru, kipato kukiongeza,
   Huo unakupa nuru, pale palipo na giza,
   Ni lulu usikufuru, hiyo ukatelekeza,
   Ni lazima kupambana, kupata vyenye thamani.
6. Kuyafanya maamuzi, yawezayo kukujaza,
   Usilale usingizi, muda ukapitiliza,
   Amua fanyia kazi, bila muda kupoteza,
   Ni lazima kupambana, kupata vyenye thamani.
7. Ukifanya maamuzi, kujiburuza buruza,
   Kwako ni maangamizi, vile utavyopoteza,
   Amka fanyia kazi, mwenyewe kijiongoza,
   Ni lazima kupambana, kupata vyenye thamani.
8. Hebu angalia watu, na jaribu kuchunguza,
   Wengi tawaona watu, na hata kuwapongeza,
   Sababu ya uthubutu, ulowafanya kuweza,
   Ni lazima kupambana, kupata vyenye thamani.
9. Huko huko kuna watu, ambao wajilegeza,
   Maisha yao ni butu, hakuna cha kupongeza,
   Kwenda kufyeka msitu, kwao ni kujiumiza,
   Ni lazima kupambana, kupata vyenye thamani.
10. Ili weze lima shamba, machaka ni kupunguza,
    Mikono yaweza vimba, ndivyo unajisogeza,
    Utavuna kule shamba, kama hutajilegeza,
    Ni lazima kupambana, kupata vyenye thamani.

Na Lwaga Mwambande (KiMPAB)
lwagha@gmail.com 0767223602