Balozi Mbarouk ashiriki maadhimisho miaka 29 Uhuru wa Afrika Kusini, awaita wawekezaji

NA MWANDISHI WETU, DAR ES SALAAM

Naibu Waziri Mambo ya Nje na Ushirikiano wa Afrika Mashariki Mhe. Balozi Mbarouk Nassor Mbarouk (wa tatu kulia) aliposhiriki maadhimisho ya miaka 29 ya Uhuru wa Jamhuri ya Afrika Kusini yaliyofanyika jijini Dar es Salaam Aprili 2023

Naibu Waziri Mambo ya Nje na Ushirikiano wa Afrika Mashariki Balozi Mbarouk Mbarouk akizungumza katika maadhimisho ya miaka 29 ya Uhuru wa Jamhuri ya Afrika Kusini yaliyofanyika jijini Dar es Salaam

Naibu Waziri Mambo ya Nje na Ushirikiano wa Afrika Mashariki Balozi Mbarouk Mbarouk akiongoza wanadiplomasia waliohudhuria maadhimisho ya miaka 29 ya Uhuru wa Jamhuri ya Afrika Kusini kukata keki malum kwa ajili ya maadhimisho hayo yaliyofanyika jijini Dar es Salaam

Naibu Waziri Mambo ya Nje na Ushirikiano wa Afrika Mashariki Mbarouk Mbarouk akiwa na Mabalozi kutoka nchi mbalimbali wanaowakilisha nchi zao nchini waliposhiriki maadhimisho ya miaka 29 ya Uhuru wa Jamhuri ya Afrika Kusini yaliyofanyika jijini Dar es Salaam

Naibu Waziri Mambo ya Nje na Ushirikiano wa Afrika Mashariki Mbarouk Mbarouk akisalimiana na Balozi Mstaafu Getrude Mongela walipokutana katika maadhimisho ya miaka 29 ya Uhuru wa Jamhuri ya Afrika Kusini yaliyofanyika jijini Dar es Salaam

Baadhi ya Mabalozi kutoka nchi mbalimbali wanaowakilisha nchi zao nchini waliposhiriki maadhimisho ya miaka 29 ya Uhuru wa Jamhuri ya Afrika Kusini yaliyofanyika jijini Dar es Salaam

NAIBU Waziri Mambo ya Nje na Ushirikiano wa Afrika Mashariki Balozi Mbarouk Mbarouk ameshiriki sherehe za maadhimisho ya miaka 29 ya Uhuru wa Jamhuri ya Afrika Kusini zilizofanyika jijini Dar es Salaam na kuwaita wawekezaji wengi zaidi waje kuwekeza nchini.

Akizungumza katika hafla hiyo Balozi Mbarouk amesema Tanzania itaendelea kushirikiana na Afrika Kusini kuendelea kuuenzi uhusiano wa kidugu na wa kihistoria uliopo kati ya nchi hizo ambao uliasisiwa na viongozi waasisi wa mataifa hayo.

“Tanzania itaendelea kutumia fursa za uwekezaji zinazopatikana nchini Afrika Kusini na nitoe wito kwa wawekezaji wengi zaidi wa Afrika Kusini waje Tanzabia kuwekeza hasa ikizingatia kuna fursa katika maeneo ya kilimo, uzalishaji, mifugo, viwanda vya dawa, usafiri, utalii, madini na viwanda vya kusindika mazao ya chakula,”alisema.

Alisema wakati Taifa la Afrika Kusini likiadhimisha siku ya uhuru wake Tanzania itaendelea kushirikiana na Afrika Kusini ili kuhakikisha nchi zote zinanufaika na uwepo wa uhusiano huo.

Alisema ushirikiano mzuri uliopo kati ya Tanzania na Afrika Kusini umeoneshwa zaidi na ziara ya kitaifa aliyoifanya nchini Afrika Kusini Rais wa Tanzania Dk. Samia Suluhu Hassan pamoja na kufanyika kwa mikutano ya pamoja kati ya nchi hizi.

Akizungumza katika hafla hiyo Balozi wa Afrika Kusini nchini Noluthando Mayende- Malepe alisema Afrika Kusini inajali na kuthamini mchango mkubwa ambao Tanzania imetoa katika harakati za ukombozi wa nchi hiyo na kuifanya Tanzania kuwa nyumbani kwa wapigania uhuru wa Afrika Kusini.

“Tunaishukuru sana serikali na wananchi wa Tanzania kwa mambo yote ambayo Tanzania imeifanyia Afrika Kusini wakati wote hadi kufikia kupata uhuru wetu, kwakweli sisi tunawashukuru sana, niwahakikishie kuwa Afrika Kusini itaendelea kuuthamini mchango wenu katika uhuru wetu na tutaendelea kuuenzi uhusiano wa kidugu na wa kihistoria uliopo kati ya nchi zetu mbili hizi, alisema.

Ameahidi kuwa Tanzania na Afrika Kusini zitaendelea kushirikiana katika mambo mengi ambayo nchi mbili hizi zimekuwa zikiyafanya.

Hafla hiyo ilihudhuriwa na Mabalozi na Wakuu wa Mashirika ya Kimataifa wanaoziwakilisha nchi zao hapa nchini