JAPO MGUU MMOJA

NINA mguu mmoja, mwingine umevunjika,
Kwa hatua moja moja, hivi ndivyo naondoka,
Ninajua siku moja, niendako nitafika,
Japo mguu mmoja, niendako nitafika.
Mbona hata huyo kobe, pole pole anafika,
Ni kwa nini unibebe, na wakati sijachoka,
Wewe nipigie debe, nivuke vyote vichaka,
Japo mguu mmoja, niendako nitafika.
Unajua sitembei, bali ninarukaruka,
Teso langu siombei, na wewe likakufika,
Wala mimi siongei, kama nimefilisika,
Japo mguu mmoja, niendako nitafika.
Moja yangu pia bora, namshukuru Rabuka,
Nisijepigiwa kura, kwamba ninalalamika,
Mwenyewe akunje sura, na huo ajenipoka,
Japo mguu mmoja, niendako nitafika.
Nitakuja piga nduru, mwisho nitakapofika,
Hata kama ni Tunduru, kelele zitasikika,
Kwamba nimeona nuru, kileleni nimefika,
Japo mguu mmoja, niendako nitafika.
Wapo wanaodhania, kwamba ninafadhaika,
Tena wanafikiria, guu moja litachoka,
Waijue yangu nia, ni kileleni kufika,
Japo mguu mmoja, niendako nitafika.
Badala ya kushangaa, na yangu kuhangaika,
Hebu cheki yako saa, muda wako wakatika,
Fanya yanayokufaa, pazuri yatakuweka,
Japo mguu mmoja, niendako nitafika.
Wa mbili havai moja, msemo unasikika,
Lakini naye wa moja, anapaswa kutamka,
Kwamba anaweza kuja, hata kwa kuchoka choka,
Japo mguu mmoja, niendako nitafika.
Nasema na wangu moyo, nje hayatasikika,
Usijevunjika moyo, kimoja kikikutoka,
Jua Mungu huyo huyo, hatakuacha hakika,
Japo mguu mmoja, niendako nitafika.
Miye mbele ninasonga, njiani sitadondoka,
Na mlango nitagonga, pasipo hata kuchoka,
Na maombi nitachonga, hadi nitaposikika,
Japo mguu mmoja, niendako nitafika.
Mungu wetu anajua, sisi tukihangaika,
Mizigo kwake kitua, atatupa ushirika,
Na siku tusoijua, tutakuja changamka,
Japo mguu mmoja, niendako nitafika.
Ndugu sikate tamaa, yale mambo umeshika,
Hata yawe ni balaa, yanayoleta kuchoka,
Mungu atayavagaa, na yote yatayeyuka,
Japo mguu mmoja, niendako nitafika.
Hata kama ni maombi, ya kuzitaka baraka,
Wewe usifanye dhambi, kwa Mungu zidi kudeka,
Kwako atapiga kambi, na kukujibu haraka,
Japo mguu mmoja, niendako nitafika.
Mwenye miguu miwili, hiyo kwako ni baraka,
Situmie kikatili, wengine ukawacheka,
Yatakukuta makali, ubaki kubabaika,
Japo mguu mmoja, niendako nitafika.
Ona wale makatili, jinsi wanavyoumbuka,
Yabumbuluka madili, na kuvileta vibweka,
Mwisho wakata kauli, watupwa kwenye machaka,
Japo mguu mmoja, niendako nitafika.
Ukiikosa busara, na kuuvuka mpaka,
Asoangalia sura, kifungoni takusweka,
Na huko tutakuchora, kama zile takataka,
Japo mguu mmoja niendako nitafika
Mungu wangu niongoze, njia ninayoishika,
Lengo nikalitimize, hata ipite miaka,
Wengi wakajiulize, ni kwa vipi nimefika,
Japo mguu mmoja, niendako nitafika.
Hata sasa Bwana Mungu, umenibeba hakika,
Hata kikija kiwingu, wala sitafadhaika,
Ninajua ndani yangu, katu sitajaumbuka,
Japo mguu mmoja, niendako nitafika.