NA MWANDISHI WETU, DAR ES SALAAM
CHUPA 44 za damu zimekusanywa katika zoezi la kuchangia damu kwaajili ya watoto watakaofanyiwa upasuaji wakati wa kambi maalumu ya upasuaji inayofanywa na wataalamu wa Taasisi ya Moyo ya Moyo Jakaya Kikwete (JKCI) kwa kushirikiana na wenzao kutoka mradi wa Little Heart wa Shirika la Muntada Aid lenye makao yake makuu mjini London nchini Uingereza.
Kambi hiyo imeanza leo Mei 12, 2023 hadi Mei 19, 2023 jijini Dar es Salaam.
Akizungumzia zoezi hilo la kuchangia damu Daktari bingwa wa Upasuaji wa Moyo kwa watoto wa Taasisi ya Moyo Jakaya Kikwete (JKCI) Godwin Sharau amesema uhitaji wa damu katika upasuaji wa moyo kwa watoto ni mkubwa kwani mtoto mmoja anaweza kutumia chupa za damu mbili hadi nne wakati wa upasuaji.
“Upasuaji wa moyo unahitaji damu nyingi sana kwa sababu baadhi ya damu hutumika katika mashine inayosambaza damu kwa mgonjwa wakati wa upasuaji na damu nyingine uandaliwa kwa ajili ya dharura pale ambapo damu itahitajika”, amesema Dk.Sharau
Kwa upande wake katibu Mkuu wa Taasisi inayojihusisha na huduma za kijamii ikiwemo na kuchangia damu JAI Saad Salim alisema kuchangia damu ni moja ya utaratibu wa kikundi hicho kwani wanafahamu ya kwamba damu uhai na uhitajika kwa wagonjwa wanaofanyiwa upasuaji.
“Huu ni utaratibu wa kikundi chetu kuchangia damu ili kuokoa maisha ya wengine, kwa hapa JKCI hii ni mara yetu ya pili kuchangia damu, mara ya kwanza tulichangia damu mwaka 2015 ambapo kupitia Taasisi yetu uniti 35 za damu zilipatikana”.
Akitoa wito kwa jamii kuwa na utaratibu wa kuchangia damu Saad Salim alisema jamii inatakiwa kuona umuhimu wa kujitokeza kuchangia damu pale huduma hiyo inapohitajika mahospitalini kwani kuokoa maisha ya mgonjwa anayehitaji damu ni thawabu.
“Jamii itambue ya kwamba mahitaji ya damu ni makubwa hivyo inatakiwa kuweka utaratibu wa kuchangia damu katika mahospitali yetu kwani unapochangia damu inakwenda kuwasaidia wananchi wengine ambao nao wanatamani kuwa na afya kama sisi tulivyo”, amesisitiza Salim.
Naye Ofisa uhamasishaji Kanda ya Mashariki kutoka Mpango wa Taifa wa Damu Salamu Mary Meshy alisema muitikio wa wananchi kuchangia damu umekuwa mkubwa kwa kiasi chake lakini jamii bado inapaswa kutambua ya kwamba damu haijawahi kutosha hivyo waendelee kuchangia ili kuweza kuokoa maisha ya wengine.
“Watu wengi wameguswa na kufika hapa JKCI kwa ajili ya kuchangia damu ila bado uhitaji wa damu ni mkubwa, anayepaswa kuchangia damu kwa mwanamke asiwe mjamzito wala anayenyonyesha na asiwe na magonjwa yoyote hasa yale ya kurithi”, amesisitiza Mary Meshy.
Akifafanua namna ambavyo ameguswa kuchangia damu mwanafunzi wa chuo cha Paradigms Institute kilichopo Kimara jijini Dar Es Salaam Denis Mziba amesema wanachuo wenzake kutoka chuo hicho wameona umuhimu wa kushiriki zoezi la kuchangia damu kuwasaidia watoto wanaohitaji kufanyiwa upasuaji wa moyo.
“Nimewiwa mimi na wanafunzi wenzangu kuchangia damu ili kuweza kufanikisha matibabu ya upasuaji wa moyo kwa watoto wanaotibiwa hapa JKCI na tunaahidi tutaendelea kufanya hivi kila wakati”, amesema Mziba
