- Utambi niwachomee, waume mpate koma,
Kutaka vitu vya chee, bila shamba kulilima,
Amka mjionee, sitangulize wamama,
Mwanaume majukumu, siyo ya kutelekeza. - Mnawaacha pekee, mambo yao mnasoma,
Chakula mkingojee, kutoka kwa kinamama,
Na nyie mjiendee, pombe kwenda kuigema,
Mwanaume majukumu, siyo ya kutelekeza. - Ngojea niwasemee, wateseka kinamama,
Majembe wayapokee, shamba kwenda kulilima,
Mavuno na yatokee, wababa mwenda kugema,
Mwanaume majukumu, siyo ya kutelekeza. - Huruma muwaonee, wake zenu kinamama,
Watoto wawabee, mimba ona zasimama,
Kazi msiwapokee, mishikaki mnachoma,
Mwanaume majukumu, siyo ya kutelekeza. - Nje mtokelezee, kama mnayo hekima,
Kazi mzipotezee, umimi kwenu salama,
Ona mwaitwa wazee, hamna lolote jema,
Mwanaume majukumu, siyo ya kutelekeza. - Watoto watokezee, mtaani mbona noma,
Kumbe ni nyie wazee, mwatelekeza wamama,
Hebu mje tuongeee, nanyi anza kujituma,
Mwanaume majukumu, siyo ya kutelekeza. - Wake zetu tuwalee, kwa nafasi ni wamama,
Na wao tuendelee, kushikamana mazima,
Na wala isitokee, wabaki kushika tama,
Mwanaume majukumu, siyo ya kutelekeza. - Watoto sote tulee, ni jukumu la lazima,
Wakikua watulee, kinababa kinamama,
Ili wasiegemee, kwa alowajali mama,
Mwanaume majukumu, siyo ya kutelekeza. - Ni ushirika pekee, familia yaasimama,
Mabaya yatutokee, pamoja tunasimama,
Furaha tujijengee, kwa amani na salama,
Mwanaume majukumu, siyo ya kutelekeza. - Telekeza ipotee, kwa sababu siyo njema,
Umoja na utokee, nyumba ipate simama,
Mungu na aendelee, kuonyesha wake wema,
Mwanaume majukumu, siyo ya kutelekeza.
Na Lwaga Mwambande (KiMPAB)
lwagha@gmail.com 0767223602