TUUCHUNGEJE ULIMI?

1. ULIMI kama shilingi, kwa zile tabia zake,
   Huku alama ni nyingi, kwingine ziko za kwake,
   Unayo mazuri mengi, na mabaya pia yake,
   Tuuchungeje ulimi, tuishi maisha mema?
2. Salamu ni kwa ulimi, pia na matusi yake,
   Heshima ni kwa ulimi, hata dharau ni yake,
   Huu hauna usomi, unajifanyia yake,
   Tuuchungeje ulimi, tuishi maisha mema?
3. Mama kazaa mtoto, kutoka tumboni mwake,
   Amtukana mtoto, kama siyo binti yake,
   Afanyao ni utoto, ulimi wafanya yake,
   Tuuchungeje ulimi, tuishi maisha mema?
4. Baba miaka sitini, atongoza binti yake,
   Mke kamwacha nyumbani, afanya maombi yake,
   Hajui wake mwandani, anafuja ndoa yake,
   Tuuchungeje ulimi, tuishi maisha mema?
5. Unadanganya naona, wasema shauri yake,
   Hujui Mungu aona, unayo adhabu yake,
   Ulimi unajivuna, umefanya mambo yake,
   Tuuchungeje ulimi, tuishi maisha mema?
6. Pande mbili za shilingi, hiyo ni asili yake,
   Ukweli uongo mwingi, ni chukizo mbele yake,
   Uvuguvu ni mwingi, hauna nafasi kwake,
   Tuuchungeje ulimi, tuishi maisha mema?
7. Mungu atusaidie, kwa vizuri tusomeke,
   Ulimi tuutumie, kwa Mungu tukubalike,
   Wala tusijifanyie, kinyume tuadhirike,
   Tuuchungeje ulimi, tuishi maisha mema?
8. Kama maneno wasema, wasikiao wacheke,
   Pengine hiyo alama, kwako na ifahamike,
   Vile wanavyokusoma, hukupaswa usikike,
   Tuuchungeje ulimi, tuishi maisha mema?
9. Ulimi wako kisema, watu wote waitike,
   Wanajua wewe mwema, ni vizuri usikike,
   Kesho mabaya kitema, tafanya uadhirike,
   Tuuchungeje ulimi, tuishi maisha mema?
10. Ulimi kiungo chema, ni vizuri kitumike,
    Sio kupanga hujuma, za watu wapukutike,
    Ulimi uteme mema, hata Mungu aridhike,
    Tuuchungeje ulimi, tuishi maisha mema?

Na Lwaga Mwambande (KiMPAB)
lwagha@gmail.com 0767223602