SEMA VIZURI NA WATU

1. HEBU salimia watu, pesa zitakuishia,
   Sema vizuri na watu, kazi ni ya kufikia,
   Heshimu vizuri watu, cheo tumekupatia,
   Bora kuheshimu utu, huo hauna daraja.
2. Tunaishi nao watu, pesa wanajivunia,
   Bila pesa siyo mtu, vile wanakusagia,
   Hawajui sisi watu, kaburini twaishia,
   Bora kuheshimu utu, huo hauna daraja.
3. Pesa zanunua vitu, mtaani watambia,
   Lakini si kama mtu, utu twaufagilia,
   Kamwe sikufanye mtu, wengine kuwasagia,
   Bora kuheshimu utu, huo hauna daraja.
4. Pesa tambia viatu, vile tunakanyagia,
   Usiwadharau watu, waloumbwa na Jalia,
   Jua wajipaka kutu, bora haya kisikia,
   Bora kuheshimu utu, huo hauna daraja.
5. Kazi wanafanya watu, mwishoni inaishia,
   Isijekufanya katu, wengine kuwanunia,
   Itakatika kazi tu, sitini ukifikia,
   Bora kuheshimu utu, huo hauna daraja.
6. Kazi kipimo cha utu, wahenga watuambia,
   Hivyo kuheshimu watu, heshima wajipatia,
   Lakini dharau watu, utakuja kujutia,
   Bora kuheshimu utu, huo hauna daraja.
7. Cheo hukaa mtu, sisi kututumikia,
   Usije kufanya watu, kukupa wakajutia,
   Waheshimu hao watu, ndiko utakoshukia,
   Bora kuheshimu utu, huo hauna daraja.
8. Haya maisha ya watu, ngazi tofauti pia,
   Wenye nacho hao watu, na wasionacho pia,
   Wanachofanana utu, ndio wakuheshimia,
   Bora kuheshimu utu, huo hauna daraja.
9. Twapumua sote watu, chakula twakula pia,
   Tunalala sote watu, na mwishowe twajifia,
   Katu hatwendi na kitu, vyote hapa vyasalia,
   Bora kuheshimu utu, huo hauna daraja.

Na Lwaga Mwambande
lwagha@gmail.com 0767223602