‎
‎WAKALA ya Barabara za Vijijini na Mijini (TARURA) imewekeza zaidi ya Sh.Bilioni 2.76 katika ununuzi wa vifaa vya kisasa vya uchunguzi wa udongo “Geotechnical Investigation” hatua inayolenga kuimarisha usanifu wa barabara na madaraja, kuongeza ubora wa miundombinu na kupunguza gharama za ujenzi nchini.
‎
‎Akielezea uwekezaji huo, Mtendaji Mkuu wa TARURA Mhandisi Victor Seff amesema jukumu kuu la Wakala huo ni usimamizi, ujenzi na matengenezo ya mtandao wa barabara za wilaya zenye urefu wa kilomita 144,149.18 unaojumuisha barabara za lami, changarawe na udongo.

‎
‎Ameeleza kuwa kati ya mtandao huo, takribani kilomita 3,900 ni barabara za lami, zaidi ya kilomita 47,000 ni za changarawe huku zaidi ya kilomita 92,000 zikiwa ni barabara za udongo hali inayoonesha umuhimu wa kuendelea kuwekeza katika teknolojia na tafiti zinazoweza kuongeza ufanisi wa ujenzi na matengenezo ya barabara za wilaya nchini.
‎
‎”TARURA ina jukumu la kuhakikisha kazi zinazotekelezwa zinafikia viwango vinavyotakiwa, jukumu hili linatekelezwa kupitia Kitengo cha Tafiti na Udhibiti wa Ubora ambacho hufanya uchunguzi wa udongo, kupima ubora wa kazi na kufanya tafiti za malighafi zinazoweza kutumika katika ujenzi wa barabara”, amesema.

‎
‎Mhandisi Seff amefafanua kuwa ununuzi wa vifaa hivyo vya kisasa utawezesha TARURA kupata taarifa sahihi kuhusu sifa na uwezo wa udongo kubeba mizigo taarifa ambazo ni muhimu katika usanifu wa barabara na madaraja imara na yenye kudumu kwa muda mrefu.
‎
‎Ameongeza kuwa vifaa hivyo vitaiwezesha TARURA kufanya tafiti kwa ufanisi zaidi, kuimarisha uwezo wa wataalamu wa ndani na kubaini mbinu zinazoweza kupunguza gharama za ujenzi bila kuathiri ubora wa miundombinu.
‎
‎”TARURA ina maabara kuu jijini Dodoma na maabara zingine zaidi ya 15 katika mikoa mbalimbali nchini zinazotekeleza majukumu ya kupima udongo, kuthibitisha ubora wa kazi za ujenzi na kufanya tafiti za malighafi zinazopatikana katika maeneo mbalimbali”, amesema.
‎
‎Amebainisha kuwa tafiti hizo ni muhimu kwa sababu malighafi zinazotumika katika ujenzi wa barabara muda mwingine hupatikana mbali na eneo la mradi jambo linalosababisha kuongezeka kwa gharama za usafirishaji lakini kupitia tafiti hizo TARURA huchunguza malighafi zinazopatikana maeneo ya miradi na kuthibitisha kama zinafaa kutumika na zimekidhi viwango vinavyotakiwa.
‎
‎Amesisitiza kuwa Maabara za TARURA zina jukumu muhimu la kupima na kuthibitisha ubora wa udongo na kazi zinazofanyika ili kuimarisha ubora wa miundombinu inayojengwa, kuongeza uimara wake na kuhakikisha fedha zinazotumika katika miradi ya barabara zinatoa thamani inayokusudiwa.
‎
‎Katika kuimarisha matumizi ya maabara hizo, Mtendaji Mkuu amewakaribisha Makandarasi na Wahandisi Washauri wanaotekeleza miradi ya TARURA au taasisi nyingine kutumia huduma za maabara za Wakala huo zilizopo Dodoma na katika mikoa mbalimbali nchini.
‎
‎Amesema maabara hizo zina vifaa vya kisasa vinavyoendana na mahitaji ya sasa ya sekta ya ujenzi huku wataalamu wa TARURA wakiwa wamepatiwa mafunzo yanayowawezesha kufanya uchunguzi na tafiti za udongo kwa ufanisi.
‎
‎Aidha, ameeleza kuwa TARURA itaendelea kuongeza vifaa na kuimarisha maabara zilizopo mikoani ili kupanua wigo wa huduma, kuboresha upatikanaji wa huduma za upimaji na udhibiti wa ubora na kuchangia ujenzi wa barabara na madaraja yenye ubora na uimara zaidi.
‎
‎Uwekezaji huo ni sehemu ya jitihada za TARURA za kutumia sayansi, teknolojia na tafiti za kitaalamu kuboresha usimamizi wa miundombinu ya barabara, kupunguza gharama zisizo za lazima na kuimarisha mtandao wa barabara unaochochea shughuli za kiuchumi na kijamii nchini.
‎

MWANAFUNZI wa Chuo cha Taifa cha Usafirishaji (NIT), Abilai Kalela, ambaye ni Mhitimu wa Diploma ya Ufundi Umeme wa Magari, amebuni mfumo maalum wa kiteknolojia unaolenga kudhibiti vyombo vya usafirishaji kama magari, bajaji na maroli dhidi ya kuzidisha mizigo, hatua inayolenga kupunguza ajali za barabarani na kulinda vyombo hivyo dhidi ya uharibifu.

Akizungumza na Waandishi wa Habari jijini Dar es Salaam Mei 8, 2026 katika maonesho ya wahandisi vijana, Kalela amesema ubunifu huo umejikita katika kuhakikisha magari ya mizigo hayabebi mizigo inayozidi uwezo wake, hali ambayo imekuwa ikichangia ajali pamoja na kuharibu injini za magari hayo.

Amesema licha ya kuwepo kwa utaratibu rasmi wa ubebaji wa mizigo, bado baadhi ya madereva wamekuwa wakikiuka viwango vinavyotakiwa kwa kupakia mizigo kupita kiasi.

Kwa mujibu wa Kalela, mfumo huo una uwezo wa kutambua mzigo uliozidi mara moja na endapo utafungwa kwenye gari au chombo kingine cha moto, hautaruhusu chombo hicho kuondoka hadi pale mzigo utakapopunguzwa na kufikia kiwango kinachoruhusiwa.

Ameeleza kuwa pamoja na kusaidia kuongeza usalama barabarani, mfumo huo pia utawasaidia madereva kuepuka faini zinazotokana na kubeba mizigo kupita kiwango kinachokubalika.

Naye Ofisa Uhusiano wa Chuo cha Taifa cha Usafirishaji (NIT), Juma Mandai, amesema changamoto ya madereva kupakia mizigo kupita uwezo wa vyombo vya usafirishaji imekuwa ikisababisha hasara kubwa kwa wamiliki wa magari, maroli na bajaji, pamoja na kuchangia uharibifu wa barabara.

Ameongeza kuwa kupitia ubunifu wa Kalela, changamoto hiyo inaweza kupungua kwa kiasi kikubwa kwa kusaidia vyombo vya usafirishaji kudumu kwa muda mrefu na kupunguza gharama za matengenezo.

Mandai amesema katika kuhakikisha bunifu hizo za vijana zinaleta tija chuo hicho kwa kushirikiana Tume ya Vyuo Vikuu na Elimu ya Juu ya Sayansi na Teknolojia (COSTECH) imekuwa ikihakikisha bunifu za wanafunzi zinaendelezwa ili ziweze kutoa suluhisho la changamoto mbalimbali katika jamii.

Aidha Mandai amesema chuo hicho kinaendelea kuwajengea uwezo wanafunzi wao wa kubuni miradi yenye lengo la kutatua changamoto mbalimbali katika jamii.

SHIRIKA la Mawasiliano Tanzania (TTCL) limezindua rasmi huduma mpya ya intaneti yenye kasi kubwa ijulikanayo ‘TTCL Faiba Supersonic Experience, Kasi Balaa’, hatua inayolenga kuharakisha mageuzi ya kidijitali na kuwapa Watanzania huduma bora zaidi za mawasiliano.

Akizungumza wakati wa uzinduzi wa huduma hiyo, Mkurugenzi wa Biashara TTCL, Vedastus Mwita amesema kuwa tukio hilo linaashiria mwanzo wa hatua mpya katika safari ya maendeleo ya teknolojia ya mawasiliano nchini, huku TTCL ikiendelea kuongoza juhudi za kuimarisha miundombinu ya mawasiliano na kutoa huduma za kisasa kwa wananchi.

Amesema TTCL imeendelea kuwekeza katika ubunifu na upanuzi wa miundombinu ya mawasiliano ili kuhakikisha Watanzania wanapata huduma za intaneti zenye kasi, ubora na uhakika, ambazo zimekuwa mhimili muhimu katika kuendesha shughuli za kijamii na kiuchumi katika dunia ya sasa ya kidijitali.

“Tumekusanyika sio tu kwa ajili ya tukio la uzinduzi, bali kushuhudia hatua inayoongeza kasi ya mageuzi makubwa katika teknolojia ya mawasiliano nchini. Katika safari hii ya mabadiliko, TTCL imeendelea kuwa kinara kwa kuleta ubunifu, kuimarisha miundombinu na kufungua fursa mpya za mawasiliano kwa Watanzania wote,” amesema

Ameongeza kuwa katika enzi ya sasa ya teknolojia ya kidijitali, huduma za intaneti zenye kasi kubwa zimekuwa nguzo muhimu katika sekta mbalimbali ikiwemo biashara, elimu, afya pamoja na ubunifu wa vijana.

“Leo hii dunia inabadilika kwa kasi kubwa. Intaneti yenye kasi, gharama nafuu na uhakika si anasa tena bali ni hitaji la msingi kwa maendeleo ya taifa. Ndiyo maana TTCL imeendelea kuweka nguvu kubwa katika kuboresha miundombinu ya mawasiliano na kupanua huduma ili kuwafikia Watanzania wengi zaidi,” amesema

Hata hivyo Mwita amesema kuuwa huduma hiyo mpya ya Faiba Supersonic Experience imeboreshwa ili kukidhi mahitaji ya sasa ya wateja wanaotumia teknolojia katika shughuli mbalimbali kama kujenga Smart Home, kuendesha Smart Office, kufanya biashara mtandaoni, kucheza michezo ya mtandaoni pamoja na ku-stream video na maudhui mbalimbali ya kidijitali.

“Huduma hizi zote zinahitaji intaneti yenye kasi kubwa na uhakika. Ndiyo maana TTCL imekuja na huduma hii mpya yenye vifurushi vya kasi ya ajabu ambavyo vitamuwezesha mteja kufanya shughuli zake za kidijitali bila usumbufu wowote,” amesema

Amebainisha kuwa kupitia vifurushi vipya vya Faiba Supersonic Experience, wateja wataweza kuchagua huduma kulingana na mahitaji yao, ikiwemo kifurushi cha T-Fiber Busta chenye kasi ya 60/60 Mbps kwa gharama ya Sh. 55,000 kwa mwezi pamoja na dakika 250 za simu ya mezani.

“Vifurushi vingine ni pamoja na T-Fiber Triple Hub Plus chenye kasi ya 100/100 Mbps kwa Sh. 70,000 kwa mwezi, T-Fiber Triple Hub Extra chenye kasi ya 150/150 Mbps kwa Sh. 100,000 kwa mwezi, T-Fiber Triple Hub Balaa chenye kasi ya 200/200 Mbps kwa Sh. 150,000 kwa mwezi pamoja na T-Fiber Triple Hub Jumbo chenye kasi ya 250/250 Mbps kwa Sh. 200,000 kwa mwezi,” amesema

Ameongeza kuwa wateja watakaojiunga na vifurushi hivyo pia watapata ofa ya laini za simu za mkononi za TTCL bure kulingana na kifurushi watakachochagua.
Kwa mujibu wake, huduma hizo mpya zitawawezesha wateja ku-stream video za ubora wa juu (HD na 4K) bila kukatika, kucheza michezo ya mtandaoni kwa kasi na uhakika, kupakua na kupakia taarifa kwa haraka pamoja na kutengeneza na kusambaza maudhui ya kidijitali kwa ufanisi mkubwa.

Aidha amesema kuwa TTCL itaendelea kuboresha huduma zake ili kukidhi mahitaji yanayoongezeka ya wateja katika kipindi hiki cha mapinduzi ya kidijitali.

“Safari ya maboresho ya huduma zetu ndiyo imeanza, na bado tunaendelea kuja na ubunifu zaidi ili kuhakikisha Watanzania wanapata huduma bora zaidi za mawasiliano. Sasa ni wakati wa kufurahia intaneti ya kweli ya kasi kubwa mlangoni kwako,” amesema

WATAALAMU wa uhifadhi nchini, wametakiwa kubuni Teknolojia rahisi zitakazopunguza migogoro baina ya binadamu na Tembo.

Serikali hutumia takriban sh 4 bilioni kila mwaka, kulipa fidia kwa wananchi wanaodhurika na tembo na wanyamapori wengine nchini.

Mkurugenzi Mkuu wa Taasisi ya Utafiti wa Wanyamapori nchini (TAWIRI), Dk. Ernest Mjingo akizindua mradi wa kukabiliana na migogoro baina ya Tembo na Binadamu katika eneo la Ikolojia ya Tarangire -Manyara, alisema changamoto ya Tembo imekuwa ni kubwa katika maeneo mengi nchini.

Dk. Mjingo alisema ili kukabiliana na changamoto hiyo ni muhimu kuendelea kubuniwa teknolojia ambazo ni rafiki kwa wananchi ili zitumike kudhibiti tembo kuendelea kuvamia mazao na kufanya uharibifu.

Alisema kila siku wahifadhi na watafiti, wanapaswa kubuni mbinu mpya za kukabiliana na Tembo, kwani Tembo nao wana akili ambazo zinawafanya kubadilisha mbinu zao za kufanya uvamizi.

Dk. Mjingo alisema mbinu hizo, zinapaswa ziende kwenye jamii ili jamii izielewe vizuri na kuweza kuzitumia kwa muda mrefu kukabiliana na migogoro baina ya Tembo na Binadamu.

Hata hivyo, alisema kuongezeka kwa Tembo nchini ni mafanikio ya kuimarishwa uhifadhi na sasa kinachopaswa kufanywa ni kuendelea kuwa na uhifadhi endelevu lakini pia wananchi wananufaika kiuchumi.

Dk. Mjingo alipongeza shirika lisilo la kiserikali la uhifadhi la Tembopilipili kuja na mradi wa kudhibiti tembo kupitia ufugaji wa nyuki, mradi ambao utafanyika katika vijiji vinavyopakana na hifadhi ya Taifa ya Tarangire na Manyara.

Akizungumzia mradi huo, Mkurugenzi wa taasisi ya Tembo pilipili, Dk.Alex Chang’a alisema taasisi hiyo tangu mwaka 2009 imekuwa na miradi ya kupunguza migogoro baina ya Tembo na binaadamu maeneo mbali mbali nchini.

Dk. Chang’a alisema katika mradi huo mpya uliozinduliwa unafadhiliwa na taasisi ya Vetenary without border ya Sweden kwa zaidi ya Sh.Milioni 50 na unatarajiwa kutekelezwa katika Kijiji cha Kakoi wilayani Babati.

“Katika utekelezaji wa mradi huo kwa awamu ya kwanza tunafunga uzio wa mizinga 100 ili kuzuia Tembo kuvamia makazi na mashamba lakini pia kutazalishwa asali kwa wananchi na hivyo kuwa moja ya faida za kiuchumi”alisema

Alisema katika utekelezwa wa mradi huo, malengo ya jumla ni kuwa na mizinga takriban 500 katika vijiji ambavyo vitahusika katika mradi huo, ambao ni sehemu ya mradi wa muda mrefu katika eneo hilo kupunguza migogoro baina ya binaadamu na wanyamapori.

“Leo tumekutana hapa tutowe Mawazo, tuna watafiti wa wanyamapori, wataalam wa ufugaji nyuki, watafiti na wasomi Chuo kikuu cha Dar es Salaam, Wanahabari wa masuala ya uhifadhi na watendaji wa serikali katika sekta ya uhifadhi na Utalii”alisema

Dk. Chang’a alisema katika usimamizi wa mradi huo, kutakuwa na maafisa katika vijiji ambavyo vitatekeleza mradi ili kuwepo na usimamizi wa kila siku lakini pia umiliki wa mradi utakuwa wa ubia baina ya wananchi na Tembopilipili ili kuwepo na uendelevu wa mradi huo.

“Tunakusudia kuwa na Kituo cha Utalii, ambapo asali na mazao mengine ya Nyuki yatauzwa kwa watalii wanaofika Tarangire na wananchi wengine”alisema.

Akitoa mada katika ufunguzi huo, Msimamizi wa mradi wa Tembo Tarangire Revocatus Meney na mtafiti wa miradi ya ufugaji nyuki wa TAWIRI, Dk. Wilfred Marealle kwa Pamoja walieleza mradi huo ni mzuri na utapunguza migogoro baina ya Tembo na binadamu.

Meney alisema TAWIRI wameendelea na utafiti wa Tembo katika eneo la Tarangire na kubaini idadi ya Tembo inaendelea kuongezeka na sasa wameainisha makundi 19 ya tembo takriban 4000 waliopo Tarangire.

Hata hivyo, alisema manufaa ya mradi huo, yataonekana kukiwepo na usimamizi mzuri, utunzwaji wa kumbukumbu na ushirikishwaji wa jamii ili kuona faida za ufugaji nyuki lakini pia kupunguza madhara ya Tembo.

Dk.Marealle alisema TAWIRI imeimarisha kitengo cha ufugaji nyuki kwa kutoa ushauri za kitaalam ili kuwezesha wananchi kufuga nyuki kwa kuzuia Tembo kuvamia mashamba na makazi yao.

Katika uzinduzi huo, wataalam wa uhifadhi na watafiti, walitoa maoni na mapendekezo mbalimbali ili kuboresha mradi huo kwa manufaa ya uhifadhi na wananchi kwa ujumla.

KIJANA Emmanuel Bombo ametengeneza mashine maalumu kwa ajili ya kuuza mtandao kwa bei rahisi ya Sh.200 hadi 500 ili kuweza kuwafikia watanzania wengi zaidi wenye kipato cha kawaida.

Akizungumza na Demokrasia Digital  akiwa ndani ya banda la Shirika la Viwanda Vidogo Vidogo (SIDO)katika Maonesho ya 48 ya Biashara Kimataifa yanayoendelea katika Viwanja vya Mwalimu Julius Nyerere jijini Dar es Salaam, Bombo alisema kwenye hiyo mashine mtu akitumbukiza kiasi cha Sh. 500 anaweza kupata huduma ya mtandaoni kwa saa 24 huku atakayetumbukiza Sh. 200 atapata huduma hiyo ndani ya saa tano.

Amesema mashine hiyo inayoa huduma ya mtandao kwa bei nafuu kiasi kwamba mtanzania yeyote anaweza kutumia na kupata hduma hiyo.

“Kitu kilichonifanya nivumbue hii mashine niliona watanzania wengi wanatumia muda mwingi kwenye mtandao na wengi wanalalamika kuwa bando haziwatoshi huku zingine ni gharama wanashindwa kumudu.

“Nimeunda hichi kitu ambacho kinaweza kuwapatia huduma hiyo kwa bei nafuu mtu ukiwa n ash. 500 au 200 unaweza kupata huduma ya mtandao na ukaperuzi kitu chochote kile kadiri unavyoweza,” amesema Bombo

Amesema mashine hiyo ina uwezo wa kutoa hudua hiyo ndani ya mita 300 hivyo inaweza kukaa sokoni, au sehemu yoyote ile yenye mkusangiko wa watu wengi.

“Kwa kipindi cha miezi sita tangu nitengeneze mashine hii nimeweza kuwafikia watu zaidi ya 1000 na tumeshaweka kwenye vituo mbalimbali,” amesema

Aidha amesema alifikiria kubuni mashine hiyo baada ya kumaliza elimu yake ya chuo mwaka 2019.