WAKALA wa Vipimo (WMA) umefanikiwa kupata nafasi ya Mshindi wa Pili katika kundi la Taasisi za Umma kwenye Kilele cha Maonesho ya Wakulima, Wafugaji na Wavuvi (Nane Nane) Kanda ya Ziwa Mashariki.

Maonesho hayo yaliyohusisha mikoa ya Mara, Simiyu na Shinyanga yalifanyika katika Viwanja vya Nyakabindi, Mkoa wa Simiyu na kumalizika kwa ushindi huo mnono kwa WMA.

Mgeni Rasmi katika Hafla ya kilele cha maonesho hayo alikuwa ni Waziri wa Ardhi, Nyumba na Maendeleo ya Makazi, Dk. Leonard Akwilapo ambaye ndiye aliwakabidhi WMA cheti na kikombe cha ushindi wa pili sambamba na washindi wengine.

Akizungumza mara baada ya kupokea tuzo hiyo, Meneja wa WMA Mkoa wa Simiyu, Happy Titi alisema ushindi huo ni matunda ya jitihada za WMA katika kutoa elimu kwa wakulima na wafanyabiashara kuhusu umuhimu wa kutumia vipimo sahihi.

“Tunamshukuru Mungu na tunampongeza Ofisa Mtendaji Mkuu na wafanyakazi wote. Ushindi huu unatupa nguvu zaidi ya kuendelea kuelimisha jamii yetu ya Kanda ya Ziwa Mashariki kuhusu vipimo sahihi ili kuongeza tija na kuepuka hasara katika biashara,” alisema Titi.

Katika kipindi chote cha maonesho, Wataalamu wa WMA walikuwa wakitoa elimu kuhusu matumizi ya vipimo sahihi katika mazao ya kilimo na mifugo pamoja na umuhimu wa kutumia mizani iliyohakikiwa.

Titi amewashukuru wananchi wote wa mikoa mitatu waliofika katika banda la WMA na kuahidi kuendelea kutoa huduma bora zaidi.

WAKALA wa Vipimo (WMA) umemuhakikishia Mkuu wa Wilaya ya Iramba, Selemani Mwendwa kuwa utaongeza kasi ya utendaji kazi wa masuala ya vipimo katika wilaya hiyo ili kulinda uchumi wa wakulima na wafugaji.

Hakikisho hilo limetolewa Agosti 8, 2026 alipotembelea banda la WMA kwenye Maonesho ya 33 ya Wakulima Nane Nane, Viwanja vya Dk.John Samwel Malecela, Dodoma, na kupatiwa elimu ya vipimo.

Meneja wa WMA Mkoa wa Singida,Willie Amosi alisema kuwa “WMA itashirikiana na Ofisi ya Mkuu wa Wilaya kuratibu na kutoa elimu ya vipimo katika maeneo mbalimbali ya Iramba kwa lengo la kufikia wakulima wa mahindi, alizeti na pamba pamoja na wafugaji kwenye minada na masoko.

Aidha, alimjulisha Mkuu wa Wilaya kuwa WMA itajipanga ili kuanzisha Klabu za Vipimo (Vipimo Clubs) katika shule mbalimbali za msingi na sekondari ikiwa ni mikakati ya kufika Tanzania nzima, hususan Tanzania Bara ambao ndiyo uwanda wa WMA.

Vilevile, Meneja Amosi alisema kuwa WMA itaendelea kushirikiana na ofisi ya Mkuu wa Wilaya ili wananchi wa Iramba waweze kuripoti moja kwa moja matumizi ya vipimo visivyo rasmi vinavyotumika katika masoko na kwamba hatua za kisheria zitachukuliwa kwa uharaka

Kwa upande wake, Mkuu wa Wilaya alisema:
“Nimefurahishwa sana. Kama Serikali ya Wilaya tuko tayari kushirikiana na WMA ili kuhakikisha vipimo sahihi vinatumika na wananchi waweze kupata stahiki ya jitihada zao. Ningetamani Iramba iwe miongoni mwa Wilaya zinazotumia vipimo sahihi katika sekta za kilimo.uvuvi pamoja na ufugaji.”

Wataalamu wa WMA walimkabidhi pia vipeperushi vyenye elimu ya vipimo ili vimsaidie kuendelea kujenga uelewa wa elimu ya vipimo.

MENEJA wa Fedha wa Wakala wa Vipimo (WMA),Ibrahim Mbinga, amesema usimamizi mbovu wa vipimo ndiyo adui mkubwa wa mfuko wa mfanyabiashara, mkulima na mnunuzi.

Akizungumza na wadau katika banda la WMA kwenye Maonesho ya 33 ya Nane Nane, Dodoma, Agosti 8, 2026 Meneja huyo amefafanua jinsi vipimo visivyo rasmi vinavyosababisha upotevu wa fedha usioonekana.

Mbinga ameeleza kuwa majukumu ya WMA yanalenga kuokoa wafanyabiashara, wakulima na walaji. “Watu wengi wanafikiri kupima kwa ndoo au visado ni rahisi. Lakini ukweli ni kwamba unajipiga risasi mguuni. Kila kilo, kila lita iliyopotea ni shilingi iliyotoka mfukoni mwako,” alisema.

Akidadavua kuhusu hesabu ya fedha kwenye vipimo, alisema vipimo ni sawa na mfuko wa fedha. “Gunia la mahindi kilo 100 ukiuza kwa ndoo 18 badala ya mizani, unapoteza kilo 10. Kama gunia ni shilingi 100,000, umepoteza shilingi 10,000. Ukiuza magunia 10 kwa wiki, umepoteza shilingi 100,000. Kwa mwezi ni milioni 1.2. Hiyo pesa ingekuwa wapi?” aliuliza.

Akieleza zaidi, alisema kuwa wafanyabiashara wengi hulalamika kupata hasara lakini akafafanua kuwa ‘unaponunua mafuta lita 19 badala ya 20, au mpunga kilo 18 badala ya 20, unalipa pesa kamili na kupata bidhaa pungufu. Hiyo ni hasara ya moja kwa moja.”

Akizungumzia mikopo kutoka Benki kwa wafanyabiashara wakulima alisema “Benki leo haziombi tu dhamana bali zinataka rekodi. Mkulima anayetumia mizani iliyohakikiwa na kuwa na risiti anaaminika zaidi. Vipimo sahihi vinakupa historia ya biashara yako ambayo benki inaitaka.”

Aidha, Mbinga pia aliwaelimisha wafanyabiashara wakulima kuepuka gharama za faini ambazo husababisha hasara.

Akifafanua, alisema “kutumia vipimo visivyo rasmi ni kosa kisheria. Unapokamatwa unalipa faini na wakati mwingine bidhaa inaweza kuzuiliwa hivyo ni hasara mbili kwa wakati mmoja.

Badala yake, aliwashauri kuwekeza kiasi kidogo cha pesa kununua mizani iliyohakikiwa na WMA ili kujiepusha na faini inayoweza kukuletea hasara.

Katika hatua nyingine, Mbinga aliwashauri wafanyabiashara wakulima ‘kujenga jina’ ili kupata faida stahiki. “Mteja anapojua kuwa kwako anapata haki yake, atarudi tena na tena na ataleta wengine. Hiyo inakupunguzia gharama ya kutafuta wateja. Uaminifu unalipa,” alisisitiza.

Meneja huyo wa Fedha, alihitimisha kwa kusisitiza kaulimbiu ya WMA isemayo “Pima kwa Haki, Pata Faida Halali” akidadavua kuwa mfanyabiashara akiwekeza kwenye mizani iliyohakikiwa leo, baada ya miezi miwili atashangaa tofauti yake kwenye akaunti yake ya fedha.

Mbinga amewataka wadau pia kutumia risiti na vitabu vya mauzo vinavyotokana na vipimo sahihi ili kufuatilia kwa urahisi mapato na matumizi.

Kwa upande wao, Wadau wameipongeza WMA kwa kuleta wataalamu wa fani mbalimbali katika banda la maonesho ya Nane Nane na kusema elimu ya kifedha imewapa uelewa mpya.

WAKALA wa Vipimo (WMA) umewataka wafanyabiashara na wananchi kuacha mara moja matumizi ya vipimo visivyo rasmi, ikiwemo ndoo, mafungu, visado na makopo, katika uuzaji wa mazao ya kilimo na mifugo na badala yake kutumia mizani iliyohakikiwa kwa mujibu wa sheria.

Wito huo umetolewa na Afisa Mtendaji Mkuu wa WMA, Alban Kihula, leo Agosti 8, 2026 wakati akizungumza na waandishi wa habari katika Maonesho ya 33 ya Kitaifa ya Siku ya Wakulima Nane Nane, yaliyokuwa yakifanyika katika Viwanja vya Dk. John Samwel Malecela, jijini Dodoma.

Kihula amesema matumizi ya vipimo visivyo rasmi yanaweza kusababisha kutokuwepo kwa usawa katika biashara na kuwaathiri wananchi kwa kuwafanya wasipate thamani halisi ya bidhaa wanazonunua au kuuza.

Amesema WMA imeendelea kutoa elimu kwa wananchi, wakulima, wafugaji na wafanyabiashara kuhusu matakwa ya Sheria ya Vipimo, Sura ya 340, ikiwemo namna ya kutambua vipimo vilivyohakikiwa na uwekaji wa alama sahihi kwenye bidhaa zilizofungashwa.

“Ili kuwa na soko lenye haki na kuongeza tija kuelekea Dira ya 2050, hakuna soko linaloweza kuwa la haki bila matumizi ya vipimo vilivyohakikiwa kwa mujibu wa sheria,” amesema Kihula.

Akizungumzia sekta ya kilimo, Kihula amewataka wakulima kuzingatia matumizi ya vipimo sahihi katika hatua zote za uzalishaji na biashara, kuanzia uandaaji wa mashamba hadi uvunaji, uhifadhi na uuzaji wa mazao.

Amesema matumizi ya vipimo sahihi katika kujua ukubwa wa eneo la shamba yanaweza kusaidia wakulima kupanga uzalishaji kwa usahihi badala ya kutegemea makadirio.

Aidha, amewataka kuhakikisha mazao yanapimwa kwa mizani iliyohakikiwa wakati wa kuuza ili mkulima aweze kupata thamani halisi ya bidhaa zake.

Kwa upande wa wafugaji, Kihula amewataka kuacha kuuza mifugo kwa kutegemea makadirio ya macho na badala yake kutumia mizani sahihi katika kubaini uzito wa mifugo kama vile ng’ombe, mbuzi, kondoo na kuku.

Amesema utaratibu huo unapaswa pia kuzingatiwa katika uuzaji wa bidhaa zinazotokana na mifugo, ikiwemo nyama na maziwa, ili kuhakikisha mnunuzi na muuzaji wanapata thamani inayolingana na kiasi cha bidhaa kinachouzwa.

Wakati huohuo, Kihula amewapongeza wavuvi kwa kuendelea kuonesha mfano mzuri katika matumizi ya vipimo na kuwataka kuendeleza utaratibu huo.

Amesema matumizi ya vipimo sahihi katika shughuli za uvuvi ni muhimu katika kuhakikisha biashara inafanyika kwa uwazi na kwa kuzingatia thamani halisi ya bidhaa.

Kihula amewataka wananchi kuwa mstari wa mbele kukataa kuhudumiwa kwa vipimo visivyo rasmi wanaponunua bidhaa kama vile viazi, bamia, vitunguu na nyanya, badala yake kusisitiza bidhaa hizo zipimwe kwa mizani iliyohakikiwa.

“Wananchi wasikubali kununua bidhaa kwa mafungu, visado au vipimo vingine visivyo rasmi. Wanapaswa kusisitiza kupimiwa kwa mizani iliyohakikiwa ili kuhakikisha wanapata kiasi sahihi cha bidhaa wanacholipia,” amesema.

Aidha, amewataka wananchi kutoa taarifa kwa WMA wanapobaini matumizi ya vipimo visivyo halali katika maeneo yao ili hatua stahiki za kisheria ziweze kuchukuliwa.

Amesema ushirikiano wa wananchi, wafanyabiashara na taasisi za Serikali ni muhimu katika kujenga soko lenye haki, uwazi na linalozingatia matumizi ya vipimo sahihi kwa mujibu wa sheria.

Amesisitiza kuwa matumizi ya vipimo vilivyohakikiwa si suala la wafanyabiashara pekee, bali ni jambo linalomhusu kila mwananchi katika kuhakikisha anapata thamani halisi ya fedha anayolipa au mapato anayopata kutokana na bidhaa anazouza.

WAKALA wa Vipimo (WMA) umetakiwa kupanua mpango wa kuanzisha klabu za vipimo shuleni hadi katika shule za sekondari, ili kuongeza wigo wa elimu ya vipimo na kuhakikisha uelewa wa matumizi sahihi ya vipimo unafika hadi ngazi ya kaya.

Wito huo umetolewa na Mhadhiri wa Chuo cha Elimu ya Biashara (CBE), Patroba Chaulo, ambaye amepongeza WMA kwa kuanzisha klabu hizo katika shule za msingi, akisema matumizi ya wanafunzi kama mabalozi wa elimu ya vipimo ni mkakati wenye tija kubwa kwa jamii.

Amesema mpango huo unatoa fursa ya kutumia mfumo wa elimu wa “mtoto kwa mtoto” (child-to-child), ambapo wanafunzi huweza kufikisha elimu na ujumbe kwa wenzao kwa urahisi zaidi, na hatimaye kuwafikishia wazazi na familia zao.

Kwa mujibu wa Chaulo, njia hiyo inaweza kuwa na ufanisi mkubwa kwa sababu wanafunzi wana nafasi kubwa ya kushirikiana na kuwasiliana na wenzao kwa lugha rahisi na inayoeleweka, jambo linalorahisisha uenezaji wa elimu ya vipimo.

“Mtoto anaweza kumuelewesha mtoto mwenzake kwa urahisi zaidi kuliko mtu mzima anapojaribu kumwelewesha mwanafunzi. Hii inafanya mfumo wa child-to-child kuwa fursa muhimu katika kueneza elimu ya vipimo,” amesema.

Ameeleza kuwa umuhimu wa mpango huo hauishii shuleni pekee, bali unaweza kusaidia elimu ya vipimo kufika hadi ngazi ya kaya, kwa kuwa wanafunzi wanaotoka katika klabu hizo wanaishi katika familia na jamii mbalimbali.

Amesema kupitia wanafunzi hao, WMA inaweza kuwa na mtandao mpana wa mabalozi ambao utasaidia kufikisha ujumbe kuhusu umuhimu wa vipimo sahihi katika maeneo ambayo ni vigumu kwa Wakala kufika moja kwa moja.

“WMA haiwezi kufika katika kila nyumba, lakini wanafunzi hawa wanatoka katika kaya mbalimbali. Hivyo, wanakuwa kiungo muhimu cha kufikisha elimu hii kutoka shuleni hadi katika familia na jamii kwa ujumla,” amesisitiza.

Chaulo amesema elimu hiyo ni muhimu katika kuongeza uelewa wa wananchi kuhusu matumizi ya vipimo sahihi na vilivyothibitishwa, hususan katika shughuli za kila siku zinazohusisha biashara na miamala mbalimbali.

Amesema jamii yenye uelewa kuhusu vipimo inaweza kutambua umuhimu wa kuhakikisha bidhaa zinapimwa kwa vipimo sahihi na kulinda haki za watumiaji pamoja na wafanyabiashara.

Kwa msingi huo, amependekeza WMA kuendelea kuimarisha klabu hizo katika shule za msingi na kuzitanua hadi shule za sekondari ili kuwafikia vijana wengi zaidi na kujenga kizazi chenye uelewa mpana kuhusu viwango na vipimo.

Ameongeza kuwa uwekezaji katika elimu ya vipimo kupitia shule ni hatua muhimu ya kujenga utamaduni wa matumizi sahihi ya vipimo nchini, huku wanafunzi wakitumiwa kama sehemu ya suluhisho la kufikisha elimu hiyo katika jamii.

Mpango huo pia unatarajiwa kuongeza uelewa wa Watanzania kuhusu umuhimu wa kuwa na viwango na vipimo sahihi na vilivyothibitishwa (standards in measurements) katika maisha ya kila siku, hususan katika shughuli zinazohusisha biashara, ununuzi na uuzaji wa bidhaa.

WANAFUNZI wa Klabu ya Vipimo (Vipimo Club) kutoka Shule ya Msingi Mtemi Mazengo ya jijini Dodoma, wamegeuka walimu kwa siku moja baada ya kumpa elimu ya vipimo Naibu Waziri wa Viwanda na Biashara,Dennis Londo, katika banda la Wakala waVipimo (WMA), kwenye Maonesho ya 33 ya Wakulima Nane Nane, Dodoma.

Agosti 7, 2026, Naibu Waziri Londo alishangazwa na ufasaha wa wanafunzi hao walipomweleza umuhimu wa vipimo sahihi, kuandika kwa usahihi vifungashio katika bidhaa zilizofungashwa pamoja na madhara ya lumbesa.

“Nimefurahishwa sana. Watoto hawa ni mabalozi wazuri wa jamii. Uwekezaji wa WMA katika kizazi kijacho unaleta matokeo,” alisema.

Wanafunzi hao walikuwa katika ziara iliyoratibiwa na Wakala wa Vipimo ikiwa ni sehemu ya mpango wa elimu ya vipimo kwa vitendo.

]]> https://demokrasia.co.tz/2026/08/08/wanafunzi-mtemi-mazengo-watoa-elimu-ya-vipimo-kwa-naibu-waziri-londo-nane-nane/feed/ 0 https://demokrasia.co.tz/2026/08/07/fursa-za-biashara-za-mabilioni-katika-migodi-zawafungukia-watanzania/?utm_source=rss&utm_medium=rss&utm_campaign=fursa-za-biashara-za-mabilioni-katika-migodi-zawafungukia-watanzania https://demokrasia.co.tz/2026/08/07/fursa-za-biashara-za-mabilioni-katika-migodi-zawafungukia-watanzania/#respond Fri, 07 Aug 2026 12:55:12 +0000 https://demokrasia.co.tz/?p=23965 NA MWANDISHI WETU,DODOMA

SERIKALI kupitia Tume ya Madini imefungua fursa za biashara zenye thamani ya mabilioni ya fedha katika migodi kwa Watanzania,huku vijana na wanawake wakipewa kipaumbele ili kuongeza ushiriki wao katika Sekta ya Madini na kuchochea utekelezaji wa Dira ya Taifa ya Maendeleo 2050.

Hatua hiyo inalenga kujenga uchumi shindani na jumuishi unaowezesha Watanzania kushiriki kikamilifu katika shughuli za uzalishaji, kuongeza thamani ya rasilimali za madini na kunufaika zaidi na fursa zinazotokana na sekta hiyo.

Akizungumza katika Maonesho ya Nane Nane yanayoendelea katika Viwanja vya Nzuguni, Dodoma, Mjiolojia kutoka Kurugenzi ya Ukaguzi na Biashara ya Madini ya Tume ya Madini, Hassan Mkumba, amesema Tume imeainisha bidhaa na huduma 20 zitakazotolewa mahsusi na Watanzania ili kuongeza ushiriki wao katika shughuli za migodi.

Amezitaja baadhi ya huduma hizo kuwa ni usambazaji wa vilainishi migodini, huduma za usafi, huduma za kisheria zinazohusu sekta ya madini, usambazaji wa kemikali za uchenjuaji, activated carbon, uchimbaji mdogo, uchorongaji, uchambuzi wa maabara za madini, usafirishaji wa madini na huduma za ulinzi migodini.

Mkumba amesema fursa nyingine ni usambazaji wa vifaa vya usalama binafsi (PPE), uhandisi wa mitambo ya madini, matengenezo ya vifaa, usambazaji wa mafuta, upimaji na uchoraji ramani, huduma za ushauri wa kitaalamu pamoja na huduma za upishi na malazi kwa wafanyakazi wa migodini.

Amesema hatua hiyo ni sehemu ya utekelezaji wa sera za Serikali za kuimarisha ushiriki wa wazawa katika mnyororo mzima wa thamani wa madini, kuongeza ajira, kukuza biashara za ndani na kuhakikisha rasilimali za madini zinachangia kwa kiwango kikubwa zaidi katika maendeleo ya uchumi wa Taifa.

Mkumba amewataka vijana, wanawake na wafanyabiashara wa Kitanzania kujitokeza na kutumia fursa hizo kwa kuzingatia viwango na mahitaji ya sekta, akisisitiza kuwa ushiriki wao utachangia kujenga uchumi imara na kufanikisha malengo ya Dira ya Taifa ya Maendeleo 2050.

TUME ya Madini imeendelea kuimarisha ukaguzi wa migodi nchini ili kuhakikisha shughuli zote za uchimbaji zinafanyika kwa kuzingatia sheria, usalama wa wafanyakazi, afya kazini na utunzaji wa mazingira, hatua inayolenga kujenga sekta ya madini yenye tija na endelevu.

Akizungumza katika Maonesho ya Nanenane yanayoendelea jijini Dodoma, Mjiolojia na Mkaguzi wa Migodi kutoka Tume ya Madini, Paschal Juma, amesema Kurugenzi ya Ukaguzi wa Migodi na Mazingira chini ya Mkurugenzi wake, Mhandisi Hamisi Kamando, ina jukumu la kusimamia na kufuatilia shughuli zote za uchimbaji ili kuhakikisha zinazingatia Sheria ya Madini, kanuni, sera na miongozo mbalimbali ya sekta hiyo.

Amesema Kurugenzi hiyo hufanya ukaguzi wa usalama na afya mahali pa kazi, hufuatilia utekelezaji wa mipango ya usimamizi wa mazingira, urejeshaji wa maeneo yaliyochimbwa pamoja na mipango ya ufungaji migodi kwa kuzingatia viwango vinavyolinda mazingira na kuhakikisha rasilimali za madini zinatumika kwa manufaa ya kizazi cha sasa na kijacho.

Aidha, amesema Kurugenzi hiyo hupitia na kuidhinisha mipango ya uchimbaji, taarifa za utendaji wa migodi na usanifu wa miundombinu ya migodi, huku ikisimamia matumizi salama ya baruti kwa mujibu wa Sheria ya Baruti, Sura ya 45, na kanuni zake.

Paschal amesema Tume ya Madini inatumia Maonesho ya Nanenane kama jukwaa la kutoa elimu kwa wananchi, wachimbaji na wadau wa sekta kuhusu matumizi sahihi ya vifaa vya kujikinga, mbinu salama za uchimbaji, utunzaji wa mazingira pamoja na uhifadhi na matumizi salama ya baruti.

Amesisitiza kuwa elimu hiyo inalenga kuongeza uelewa wa wadau, kuimarisha uzingatiaji wa sheria na viwango vya usalama, kupunguza ajali migodini na kuendeleza sekta ya madini inayochangia ukuaji wa uchumi wa taifa kwa njia endelevu.

NAIBU Waziri wa Maliasili na Utalii, Hamad Chande, amefurahishwa na uelewa mkubwa uliooneshwa na wanafunzi waliopata elimu ya vipimo katika banda la Wakala wa Vipimo – (WMA) kwenye Maonesho ya 33 ya Wakulima Nane Nane.

Akizungumza leo Alhamisi Agosti 6, 2026 baada ya kuzungumza na wanafunzi hao aliowakuta katika Banda la WMA, Viwanja vya Dk.John Malecela Nzuguni, Dodoma, Naibu Waziri ambaye pia alikuwa katika ziara ya kutembelea mabanda mbalimbali ya Maonesho, alisema ni hatua nzuri kwa WMA kuanza kuwafundisha watoto umuhimu wa vipimo sahihi wakiwa wadogo.

.

“Nimefurahishwa sana. Watoto hawa wameelewa kuwa kipimo sahihi ni haki ya kila mtu. Hawa ndio Maofisa Vipimo wa kesho,” amesema.

Awali, Naibu Waziri Chande alipowakuta wanafunzi hao bandani aliwauliza maswali mbalimbali kuhusu vipimo na waliweza kujibu kwa ufasaha.

Wanafunzi hao wa Shule ya Msingi Blessed Mabuba iliyopo jijini Dodoma, ambao waliongozana na mwalimu wao Irene Ketta, ambaye pia alipongeza WMA kwa kujielekeza katika utoaji elimu ya vipimo mashuleni hatua ambayo alisema imewawesha wanafunzi kueleza tofauti ya kipimo sahihi na kisicho sahihi, umuhimu wa kusoma lebo na jinsi ya kutumia mizani.

“Niwape pongezi WMA Kama tutaendelea kuwapa elimu hii watoto wetu, tunajenga Taifa la wafanyabiashara waaminifu na walaji wenye ufahamu. Huu ndio msingi wa uchumi imara,” amesema Mwalimu Ketta.

WMA imeahidi kuhakikisha elimu ya vipimo inaenea kwa jamii nzima kupitia utoaji elimu kwa makundi mbalimbali wakiwemo wanafunzi.

WAJASIRIAMALI wa kikundi cha Hapa Kazi kutoka Shehia ya Mtemani Wingwi, Wilaya ya Micheweni, Mkoa wa Kaskazini Pemba wametembelea banda la Wakala wa Vipimo (WMA) katika Maonesho ya 33 ya Wakulima Nane Nane yanayofanyika Viwanja vya Dkt. John Samwel Malecela, Nzuguni, jijini hapa.

Katika ziara hiyo iliyofanyika leo Alhamisi Agosti 6, 2026, wajasiriamali hao wameshukuru kupata elimu kuhusu matumizi sahihi ya vipimo, ufungashaji bora wa bidhaa na mbinu za kuongeza ushindani wa bidhaa zao sokoni.

Mwakilishi wa kikundi hicho, Asha Mwiaka Haji, amesema maonesho hayo yameendelea kuwafungua macho na kuwaongezea uelewa mkubwa kuhusu vigezo vinavyopaswa kuzingatiwa katika biashara ili bidhaa zao ziweze kupenya kwenye masoko.

“Tumefurahi sana kufika banda la WMA maana sisi pia tuna Wakala kama hii Zanzibar. Tumejifunza jinsi ya kutumia mizani, kuweka lebo sahihi na umuhimu wa vipimo katika biashara yetu, elimu ambayo pia tumekuwa tukiipata kupitia Wakala yetu ya Vipimo Zanzibar,” amesema.

Asha ameeleza kuwa kikundi chao kinajishughulisha na usindikaji na uuzaji wa bidhaa mbalimbali zikiwemo mwani, mafuta ya mgando, sabuni za mwani pamoja na dawa za asili.

Aidha, amesema ushiriki wao katika maonesho hayo umewaongezea ujuzi na uelewa zaidi kuhusu matumizi sahihi ya vipimo, mfumo wa alama za mistari (barcodes) na mbinu bora za kufungasha bidhaa.

“Tunawashukuru WMA kwa elimu hii. Tukirudi kwetu, tutaendelea kuwaelimisha pia wajasiriamali wengine ili tuweze kuzalisha bidhaa zenye ubora na zinazokidhi viwango vya soko,” amesema

Aidha,amewahimiza wajasiriamali wenzake kushirikiana kwa karibu na maafisa wa Serikali katika ngazi ya shehia na wilaya ili kubuni mikakati itakayoongeza thamani ya bidhaa zao na kuchochea ukuaji wa uchumi.

Wakala wa Vipimo (WMA) inafanya kazi kwa ushirikiano mkubwa na Wakala wa Vipimo Zanzibar (ZAWEMA)