WAENDESHA Bodaboda wa Wilaya ya Bukombe mkoani Geita wameahidi kujitokeza na kupiga kura katika Uchaguzi Mkuu unaotarajiwa kufanyika Oktoba 29 mwaka huu.

Akizungumza katika mkutano wa pamoja uliofanyika Oktoba 7, 2025 wilayani humo na Mgombea Ubunge wa Jimbo la Bukombe kwa tiketi ya Chama cha Mapinduzi (CCM), Ndugu Doto Mashaka Biteko, Mwenyekiti wa Umoja wa Waendesha Bodaboda wa Wilaya ya Bukombe, Leonard Mtuta amesema Maafisa usafirishaji maarufu kama bodaboda wapo tayari kujitokeza kwa wingi kwa ajili ya kupiga kura ikiwa ni haki yao ya kikatiba.

“ Tuna wanachama 1,445 na sisi tuko tayari kujitokeza kwa wingi ili tupige kura na kuchagua viongozi wetu kwa nafasi ya Urais, Ubunge na Madiwani wa maeneo yetu,” amesema Mtuta.

Awali, akizungumza na waendesha bodaboda hao Dk.Biteko amewaeleza umuhimu wa kushiriki kikamilifu kupiga kura na kusisitiza kuwa upigaji kura una uhusiano mkubwa na maisha ya watu sambamba na maendeleo yao, hivyo katu wasipoteze fursa hiyo ya kujiletea maendeleo.

Pia, amewataarifu kuhusu ziara ya Rais wa Jamhuri ya Muungano wa Tanzania, Dk.Samia Suluhu Hassan ambapo anatarajiwa kuwepo Wilayani Bukombe Oktoba 12 mwaka huu.

“ Oktoba 12 Mhe. Rais Samia, Mgombea Urais kupitia Chama Cha Mapinduzi atakuwepo katika Uwanja wa Shule ya Msingi Igulwa nawaomba sana mshiriki kwa wingi katika mapokezi yake,” amesema Dk.Biteko.

Ameongeza kuwa waendesha bodaboda hao wajitokeze kwa wingi kwa kuwa kuna mengi ya kusema wakati wa ziara hiyo.

Aidha, amewahimiza kuungana na kushirikiana na viongozi wa Serikali ili kuweka mkakati wa pamoja wa kujiletea maendeleo.

MGOMBEA Ubunge wa Jimbo la Bukombe kwa tiketi ya Chama cha Mapinduzi (CCM), Dk.Doto Biteko amesema kuwa Serikali ya CCM inayoongozwa na Rais Dk. Samia Suluhu Hassan imebadilisha maisha ya watu wa Kata ya Namonge kwa kuleta miradi ya maendeleo ikiwemo kufungua barabara, maji na umeme.

Dk.Biteko amesema hayo Oktoba 1, 2025 wakati wa mkutano wa kampeni katika Kijiji cha Bwenda, Kata ya Namonge wilayani Bukombe mkoani Geita ikiwa ni sehemu Kampeni za Uchaguzi Mkuu wa Rais, Wabunge na Madiwani utakaofanyika Oktoba 29, mwaka huu.

Dk. Biteko amesema kuwa awali Kata hiyo haikuwa na maji, umeme,barabara na hata walimu waliochaguliwa kufundisha katika shule za Kata hiyo hawakufurahia kazi zao kutokana na hali iliyokuwa.

“Kituo cha afya kimekamilika, gari la kubeba wagonjwa kesho litakuwepo, leo tuna shule 14 za msingi, shule tatu za sekondari na tutataka kujenga shule zingine za kidato cha tano na sita,” amesema Dk. Biteko.

Ameendelea kusema ikiwa wananchi hao wanahitaji maendeleo zaidi amewaomba ifikapo Oktoba 29 mwaka huu wajitokeze kupiga kura huku akiwahimiza kuchagua viongozi wa CCM.

Amesema CCM ina mpango wa kukarabati Shule ya Bwenda, kupeleka umeme maeneo yote ambayo hayana umeme.

Pia, amewahimiza wananchi wa Kata hiyo kumpigia kura mgombea udiwani Mlalu ambaye mara zote ameyapa kipaumbele maendeleo ya wananchi.

“ Kura 31, 772 za wananchi waliojiandikisha kupiga kura katika Kata hii zimchague mgombea wetu wa Urais Dkt. Samia Suluhu Hassan, zinichague Mbunge Biteko na Diwani Mlalu kisha mtudai maendeleo,” amesisitiza Dk. Biteko.

Pia amewaeleza wananchi hao kuwa Oktoba 12, Dk. Samia atatembelea Jimbo lao hivyo wajitokeze kwa wingi ili kuashiria upendo na shukrani zao kwake.

Naye, Mgombea wa Udiwani Kata ya Namonge, Malalu Bundala amesema kuwa miradi yote iliyopo kwenye Kata hiyo imegharamiwa na Rais Dk. Samia Suluhu Hassan.

Ametolea mfano wa miradi hiyo kuwa ni ujenzi wa nyumba mbili za walimu katika kijiji cha Nyamagana na Shule Shikizi Bwenda.

Kuhusu miradi ya maji amesema Kata hiyo imepata visima viwili ikiwa ni hatua ya Rais Samia ya kutatua changamoto ya maji na kusogeza karibu zaidi huduma huyo kwa wananchi kwa kuchimba visima vitano katika kila Jimbo.

Pamoja na hayo amewaomba wananchi wa Kata hiyo kuwachagua wagombea wote wa CCM katika Uchaguzi Mkuu utakaofanyika Oktoba 29.

MGOMBEA Ubunge wa Jimbo la Bukombe kwa tiketi ya Chama cha Mapinduzi (CCM), Doto Biteko amesema kuwa kwa Serikali ya CCM inayoongozwa na Dk. Samia Suluhu Hassan imefanya jitihada kubwa ya kuwaletea maendeleo wananchi wa Wilaya ya Bukombe ikiwa ni pamoja na kutoa fursa za kukuza uchumi wa Wilaya hiyo.

Dk. Biteko amesema hayo Septemba 27, 2025 wakati wa mkutano wa kampeni katika Kata ya Katente wilayani Bukombe mkoani Geita ikiwa ni sehemu Kampeni za Uchaguzi Mkuu wa Rais, Wabunge na Madiwani utakaofanyika Oktoba 29, mwaka huu.

Amesema mwaka 2015 Kata ya Katente, Igulwa na Kata zote zilizopo maeneo ya mjini zilikuwa na kiwango duni sana cha maendeleo ikilinganishwa na maendeleo yaliyofikiwa sasa.

Amesema Wilaya ya Bukombe ilikuwa na shule moja ya kidato cha tano na sita, hospitali moja, zahanati nne huku umeme ukiwa katika vijiji saba pekee.

Amesema Serikali ya CCM imekuwa ikifanya jitihada kubwa ya kutekeleza miradi ya maendeleo ili kuboresha maisha ya wananchi wa Wilaya hiyo ambapo sasa inajenga jengo la Ofisi ya Mkuu Wilaya, jengo la halmashauri, soko na stendi ya kisasa.

“ Rais samia ametoa fedha kwa ajili ya ujenzi wa barabara ya Ushirombo kwenda Katoro kwa kiwango cha lami ambao unaendelea na ameruhusu watu kuchimba dhahabu katika Pori la Kigosi na sasa vijiji vyote vimepelekewa umeme,” amesema Dk. Biteko.

Ameongeza kuwa Serikali inaendelea na ujenzi wa miundombinu mbalimbali “ Tunajenga Chuo cha VETA pamoja na Chuo Kikuu vyote hivi vitasaidia kuleta mzunguko wa fedha na kukuza uchumi wetu, watu hawataki maneno wanataka maendeleo na Dkt. Samia amedhamiria kuibadilisha Bukombe,”

Sambamba na hayo, Dkt. Biteko amewahimiza wananchi wa Katente 19,000 waliojiandikisha kupiga kura ifikapo Oktoba 29 wamchague Dk. Samia kwa nafasi ya Urais, mbunge na diwani wa CCM ili kuendelea kuchochea maendeleo ya Wilaya ya Bukombe.

Akizungumzia katika mkutano wake wa kampeni Kata ya Bulangwa, Dkt. Biteko amesema kuwa Dk. Samia amesaidia sana kuleta maendeleo katika Kata hiyo na kuwa miaka mitano iliyopita alitoa fedha kwa ajili ya kutekeleza miradi ya maendeleo.

“ Hapa Bulangwa tumejenga shule ya watoto wenye mahitaji maalum, tunajenga shule ya sekondari ya kidato cha tano na sita, tunajenga Shule ya Sekondari Bulangwa,” amesema Dk Biteko.

Ametaja miradi mingine ya maendeleo iliyojengwa ni ukumbi mkubwa wa mikutano na kituo cha afya.

Aidha, wanatarajia kufikisha umeme katika vitongoji ambavyo havina umeme pamoja na kukamilisha ujenzi wa uwanja wa mpira wa kisasa.

Pamoja na hayo amewaomba wananchi wa Kata hiyo kumpigia kura diwani nyingi diwani anayegombea kwa kuwa kwa miaka mitano iliyopita amefanya kazi nzuri.

“ Kama mbunge ninaridhika mno na kazi inayofanywa na Yusuf kwa sababu anashughulikia maendeleo ya watu. Nawaomba wana Bulangwa tumpe ushirikiano kwa kumpigia kura nyingi ili aendelee kutuletea maendeleo,” amesema Dk. Biteko.

Ameendelea kusema hakuna maendeleo yanayopatikana bila kupiga kura hivyo amewaomba wananchi wa Bulangwa 15,504 waliojiandikisha kupiga kura wajitokeze Oktoba 29 na wawachague wagombea wa CCM.

Naye, Mgombea wa Udiwani Kata ya Katente, Tabu Ngwahani amesema kata hiyo imenufaika na miradi mingi ya maendeleo kama vile kujenga madarasa katika Shule za Msingi Igulwa, Bomani, Umoja, Bwenda na Katente.

Amesema kuwa wameendelea kupokea fedha kwa ajili ya ujenzi wa soko, stendi na uwanja wa mpira.

“ Tunaendelea kuboresha barabara, tulipokea shilingi milioni 300 kwa ajili ya hospitali. Pia tulipokea shilingi milioni 900 na tumejenga majengo mengine ikiwemo chumba cha upasuaji,” amesema Nkwandu.

Kwa upande wake, Mgombea wa Udiwani Kata ya Bulangwa, Yusuf Mohammed Yusuf amemshukuru Dk. Biteko kwa kutoa fedha shilingi milioni 350 kwa ajili ya kujenga Shule ya Kilimahewa.

Amesema kuwa katika Kata hiyo wanatarajia pia kujenga Shule mpya ya Msingi ya Muungano, kujenga barabara pamoja na kusogeza umeme katika Vitongoji vya Kilimahewa na Muungano.

MGOMBEA Ubunge wa Jimbo la Mtumba kwa tiketi ya CCM Anthony Mavunde ameendelea na awamu ya kwanza ya kampeni yake ya mtaa kwa mtaa kwa kila kata kuzungumza na makundi mbali katika maeneo husika.

Mavunde ameendelea na ziara yake kata ya Ihumwa na kutembelea na kuzungumza na wananchi wa Mitaa ya 𝘾𝙝𝙖𝙣𝙜’𝙤𝙢𝙗𝙚,𝘾𝙝𝙞𝙡𝙬𝙖𝙣𝙖
,𝙄𝙡𝙤𝙡𝙤 na 𝙄𝙝𝙪𝙢𝙬𝙖

Mavunde pia alitumia fursa hiyo kuwaombea kura Mgombea Urais kwa tiketi ya CCM Dk. Samia S. Hassan na Mgombea Udiwani wa kata ya Ihumwa Edward Magawa

MGOMBEA Ubunge wa Jimbo la Bukombe kupitia Chama cha Mapinduzi (CCM),Doto Biteko amesema kuwa Mgombea Urais kupitia CCM, Dk. Samia Suluhu Hassan ameiwezesha Kata ya Uyovu kimaendeleo hivyo wananchi hao hawana budi kumpigia kura nyingi Oktoba 29 mwaka huu.

Dk Biteko amesema hayo Septemba 17, 2025 wakati wa mkutano wa kampeni katika Kata ya Uyovu wilayani Bukombe mkoani Geita ikiwa ni sehemu Kampeni za Uchaguzi Mkuu wa Rais, Wabunge na Madiwani utakaofanyika Oktoba 29, mwaka huu.

“ Hakuna siku ambayo nilimuomba maendeleo Dk. Samia kwa ajili ya watu wa Uyovu na Geita akatunyima, ametupa fedha za ujenzi wa barabara nyingi ikiwemo ya kutoka Ushirombo hadi Katoro hata juzi tulimuomba barabara ya Geita kwenda Nzela hadi Sengerema kwa kiwango cha lami yote haya atatusaidia huyu ni mama ni msikivu,” amesema Dk. Biteko.

Ameongeza kuwa katika kipindi cha miaka mitano ya uongozi wa Dk. Samia chini ya CCM katika Kata ya Uyovu wamefanikiwa kujenga shule za msingi 11 na shule binafsi moja kutoka shule tatu, shule za sekondari saba na shule moja ya kidato cha tano na sita.

Pia, amesema katika Wilaya ya Bukombe kuna shule mbili za watoto wenye mahitaji maalum ambapo moja ipo Uyovu na nyingine Ushirombo.

Ametaja miradi mingine ya maendeleo iliyotekelezwa katika Kata hiyo ni pamoja na kujenga barabara za mitaa kwa kiwango cha lami, hospitali, zahanati pamoja na mradi wa maji uliogharimu Sh. Bilioni 1.1.

Kuhusu kuifanya Uyovu kuwa kitovu cha biashara amesema kuwa CCM itaongeza msukumo kwa kusogeza miundombinu ya kuiwezesha Kata hiyo kuvutia shughuli za biashara kwa wingi.

Vilevile, CCM itatoa mkopo wa Sh. Bilioni 200 kwa vijana na wanawake ili kuwawezesha wafanyabiashara ikiwemo wa Uyovu.

Pamoja na hayo amesema miaka mitano ijayo Uyovu itakuwa na maendeleo zaidi hivyo wananchi 35,000 wa Kata hiyo waliojiandikisha kupiga kura wajitokeze kwa wingi Oktoba 29 na kumchagua Dkt. Samia.

Amesisitiza “ Sasa maendeleo haya hayajatokea kwa bahati mbaya kama kuna mtu anatupenda ni Dk. Samia, Uyovu ni jeshi kubwa mkapige kura nyingi ili tuwe na sababu ya kuwaletea maendeleo,”

Naye, Mgombea wa Udiwani Kata ya Uyovu, Mathayo Kagoma amesema kuwa wananchi wa Uyovu wana ajenda moja ya maendeleo na hivyo amewaomba wananchi hao kuwaamini na kuwapigia kura wagombea wa CCM.

“ Ninyi ni mashahidi kwa miaka kumi ya uongozi wa Biteko hapa Bukombe tumepiga hatua katika elimu na maeneo mengine. Sasa tunasimama hapa tukiwa na shule za msingi 11 katika Kata yetu na nyingine zikiendelea kujengwa ili kusaidia watoto wetu,” amesema Kagoma

Amewaeleza kuwa sababu ya kumchagua Dk. Biteko ni kwa kuwa wanahitaji kupiga hatua ya maendeleo zaidi katika maeneo mengine ikiwemo afya.

MGOMBEA Ubunge wa Jimbo la Bukombe kupitia Chama cha Mapinduzi (CCM), Doto Biteko amesema endapo wananchi wa Jimbo hilo watamchagua tena kuwa mbunge wao atahakikisha anafanya jitihada ili wapate maendeleo zaidi ikilinganishwa yale waliyoyapata katika kipindi cha miaka mitano iliyopita.

Dk Biteko amesema hayo Septemba 11, 2025 wakati wa mkutano wa kampeni katika Kata ya Katome wilayani Bukombe mkoani hapa ikiwa ni sehemu Kampeni za Uchaguzi Mkuu wa Rais, Wabunge na Madiwani utakaofanyika Oktoba 29, mwaka huu.

“ Nataka niahidi, mkinichagua tena maendeleo tuliyoyapata katika kipindi cha miaka mitano iliyopita tutazidisha mara mbili kwa miaka mitano ijayo. Tunataka tuibadilishe Bukombe na mnakumbuka tulikuwa na zahanati nne tu wilaya nzima, hatukuwa na jengo la halmshauri na sasa tumejenga majengo yanayofanana na hadhi ya Wilaya ya Bukombe,” amesema Dk. Biteko.

Akitaja baadhi ya maendeleo iliyofikiwa wilayani humo amesema ina zahanati zaidi ya 60, shule za sekondari za elimu ya upili tano pamoja na ujenzi wa vituo vya afya na Chuo Kikuu unaoedelea.

Ameongeza kuwa katika kipindi cha miaka mitano iliyopita, Bukombe imebadilika kwa kiasi kikubwa na maendeleo yaliyofikiwa yatazidishwa mara dufu katika miaka mitano ijayo na hivyo amewaomba wananchi kujitokeza kwa wingi kuwachagua wagombea wa CCM.

Kuhusu Kata ya Katome, Dk. Biteko amesema Kata hiyo haikuwa na mawasiliano ya simu, hospitali, umeme, barabara na shule ya sekondari na iliwalazimu wanafunzi kwenda kusoma Shule ya Sekondari ya Ushirombo.

Aidha, amesema Serikali inayoongozwa na Rais Samia ilihakikisha inajenga shule na kuwa na mpango wa kukarabati zilizokuwepo, inajenga zahanati sambamba na kuipandisha hadhi zahanati iliyokuwepo kuwa kituo cha afya ili kuboresha huduma za jamii kwa wananchi.

Mipango ijayo ya CCM imetajwa kuwa ni pamoja na kujenga barabara ya lami kuunganisha Kata ya Katome na Mbogwe kwa ufadhili wa Benki ya Dunia na hivyo kuwahakikishia wananchi wakaopisha mradi huo malipo ya fedia

“ Mradi wa maji upo tayari tunataka tuupanue zaidi ili maeneo yote watu wapate maji na kazi hii itafanyika mkituchagua, kuna vitongoji sita havina umeme, mkituchagua tena tutaleta umeme kwenye maeneo hayo, tutaongeza minara ya mawasiliano nataka niwaambie mkituchagua tena hamtatudai hayo,”amesema Dk. Biteko.

Ameongeza “Atakapokuja Rais Samia nataka tumwambie sisi tuko tayari kumpa kura zote, ningependa kuona wapigakura wote 6,500 waliojiandikisha hapa Katome kujitokeza kupiga kura, tunataka tulete maendeleo yanayoonekana si maneno.”

Naye, Mgombea wa Udiwani Kata ya Katome, Joseph Maganga amesema kuwa CCM imetekeleza miradi mingi ikiwemo kujenga shule za sekondari na miradi ya maji ili kutatua changamoto zilizokuwepo awali.

Hivyo amewahimiza wananchi wa Kata hiyo Oktoba 29 mwaka huu kuwapigia kura wagombea wa CCM.

MGOMBEA wa Ubunge Jimbo la Bukombe, Doto Biteko amewahimiza wananchi wa Kata ya Busonzo wilayani Bukombe mkoani Geita kujitokeza kwa wingi na kuwapigia kura wagombea wa CCM ili kukipatia chama hicho ushindi wa kishindo katika Uchaguzi Mkuu ujao Oktoba 29, mwaka huu.

Dk. Biteko amesema hayo Septemba 9, 2025 wakati akiendelea na kampeni katika Kata ya Busonzo wilayani Bukombe mkoani humo.

Amesema eneo la Idoselo katika Kata ya Busonzo lilikuwa na changamoto kadhaa ikiwemo barabara na shule.

Kufuatia hali hiyo, Rais Samia alielekeza wananchi wa eneo hilo wachongewe barabara, wajengewe shule na hospitali.

“ Hapa Idoselo tumejenga Kituo Kikubwa cha Kuzalisha umeme megawati 5 ili wananchi waweze kupata umeme, tunataka kuongeza upatikanaji wa maji na baada ya uchaguzi tutapanua chanzo cha maji ili kuhakikisha kunakuwa na maji ya uhakika,” amesema Dk. Biteko.

Ametaja vipaumbele vya CCM ni kujenga shule nyingine ya sekondari Idoselo ili kupunguza adha ya wanafunzi kwenda kusoma Busonzo.

Aidha, amewahimizi wananchi na wajumbe wa CCM kujitokeza kwa wingi kupiga kura Oktoba 29 mwaka huu na kumchagua mgombea wa Urais, Dkt. Samia Suluhu Hassan ambapo pia amewaomba wananchi wamchague kwa nafasi ya Ubunge wa Bukombe pamoja na mgombea Udiwani Merikiori wa Busonzo.

Akimnadi mgombea udiwani wa Kata ya Busonzo, amesema mgombea huyo ni mchapakazi na anayetaka maendeleo hivyo, wananchi wamchague ifikapo Oktoba 29 huku akisisitiza kuwa ili CCM ishinde kwa kishindo wananchi wajitokeze kwa wingi kupiga kura.

Naye, Mgombea wa nafasi ya Udiwani Kata ya Busonzo, John Merikiori amesema ni wajibu wa wananchi kupiga kura na kuchagua wagombea wa CCM ambao wakipata dhamana ya uongozi watahakikisha wanaleta maendeleo kwa wananchi.

MGOMBEA wa Ubunge Jimbo la Bukombe, Dotto Biteko amewataka wananchi wa Kata ya Namonge, kujitokeza kwa wingi Oktoba 29 kumpigia kura Dk. Samia Suluhu Hassan kuwa Rais kwa kuwa ndiye mwenye nia thabiti ya kuwaletea maendeleo.

Dk.Biteko amesema hayo leo Septemba 9, 2025 katika mkutano wake wa kunadi sera kwa wananchi wa Kata ya Namonge wilayani Bukombe mkoani Geita.

Amesema awali sekta zote katika kata ya hiyo zilikuwa zikisuasua kimaendeleo ikilinganishwa na maendeleo yaliyofikiwa sasa.

“Kata hii haikuwa na barabara ya kutoka Uyovu – Namonge – Nyalamandula, haikuwa na zahanati wala shule za kutosha hivyo ilikuwa na maendeleo duni” amesema Dk. Biteko.

Amesema jitihada zilizofanywa na Serikali ya Rais Samia katika kuwaletea maendeleo wananchi hao ni kutekeleza miradi mbalimbali ya maendeleo ikiwemo ujenzi wa zahanati na kituo cha afya.

“ Nataka niwahakikishie mkinichagua tutaongeza wodi na zahanati, tunataka watu wa Namonge waishi kama Watanzania wa daraja la juu, Tutahakisha tunaongeza shule, kuna vijiji havikuwa na shule na tumejenga shule mpya. Tumekuja hapa kuomba kura ili tumchague Rais Samia kwa vile ni kumchagua yeye ni kuchagua maendeleo,” amesema Dk. Biteko.

Ameelezea matarajio ya CCM ni kuifanya Kata ya Namonge iwe kituo cha kilimo ikiwa ni pamoja na ujenzi wa barabara na hospitali.

Pia, amesema CCM ikipata ridhaa ya kuongoza katika miaka mitano ijayo Serikali itatoa shilingi bilioni 200 kwa ajili ya kuwakopesha vijana ili wazitumie kwa kufanya biashara sambamba na kutoa mikopo kwa wanawake na watu wenyeulemavu.

“Namonge ina wapiga kura zaidi ya 30,000 hivyo nawaomba Oktoba 29 mwaka huu tujitokeze kwa wingi tukampigie kura Rais Samia. Tunachotaka ni maendeleo na nataka kuwahakikishia Rais Samia anatupenda mno Bukombe na mwezi Oktoba atakuja hapa. Heshima pekee tutakayompa Rais wetu ni kumpigia kura kwa wingi, msiniangushe,” amesisitiza Dk. Biteko.

Akimnadi mgombea udiwani wa Namonge, Mlalu Bundala amesema ni mtu makini anayejua shida za wananchi na yuko tayari kuhakikisha Kata hiyo inapata maendeleo.

Naye, Mjumbe wa Halmashauri Kuu ya CCM Mkoa wa Geita, Amani Msuwa amesema kuwa Rais Samia ametekeleza miradi mingi ya maendeleo mkoani humo hivyo Oktoba 29 wananchi wampigie kura pamoja na mgombea Ubunge wa Jimbo la Bukombe, Dk. Dotto Biteko.

Mgombea wa Udiwani Kata ya Namonge, Mlalu Bundala amewashukuru wananchi wa Kata hiyo kwa kujitokeza kwa wingi katika mkutano huo.

Aidha, amesema katika Kata yake, Rais Samia ametoa fedha kwa ajili ya ujenzi wa barabara ya km 61, mtandao wa maji Namonge wenye mita za ujazo 21, shule za msingi 7, shule za sekondari 3 pamoja na kituo cha afya.

Ameongeza kuwa Kata hiyo ina mtandao wa umeme katika vijiji vyote na jitihada za kufikisha umeme kwenye vitongoji zinaendelea.